كەشە استانا اكىمى يمانعالي تاسماعامبەتوۆتىڭ قاتىسۋىمەن 2014-2015 ماۋسىمىنداعى جىلۋ بەرۋ ناۋقانىنا ارنالعان جيىن ءوتتى. وندا قالا اكىمىنىڭ ورىنباسارى ۆاسيلي كرىلوۆ جانە ەسىل, الماتى, سارىارقا اۋداندارىنىڭ اكىمدەرى ءمان-جايدى باياندادى.
ۆاسيلي كرىلوۆتىڭ ايتۋىنشا, 29 قىركۇيەكتە ەلوردادا جىلۋ بەرۋ ماۋسىمى باستالادى. قىستىڭ قاھارىنا قازىرگى ۋاقىتتا قالاداعى جىلۋ ورتالىقتارى تاس-ءتۇيىن دايىن كورىنەدى. استانا قالاسى ءماسليحاتىنىڭ بيىلعى شەشىمىمەن قالانى جىلىتۋ ماۋىسىمىنا دايىنداۋ جانە ونى وتكىزۋ ەرەجەسى بەكىتىلگەن بولاتىن. جىلۋ بەرۋ ءدال وسى ەرەجەگە ءسايكەس جۇرگىزىلەدى.
«ءبىلىم بەرۋ, دەنساۋلىق ساقتاۋ جانە مادەنيەت نىساندارىنىڭ جىلۋ بەرۋ ماۋسىمىنا دايىندىعى تولىعىمەن اياقتالدى. جالپى العاندا, قالا ءتىرشىلىگىن قامتاماسىز ەتەتىن مەكەمەلەر جىلۋ بەرۋ ماۋسىمىندا ۇزدىكسىز ءارى تۇراقتى جۇمىس ىستەۋگە, ەلەكتر ەنەرگياسىن جەتكىزۋگە تولىق دايىن. اۋا رايىن بولجاۋشىلارعا سەنسەك, ەرتەڭنەن باستاپ كۇن سۋىتىپ, اۋا تەمپەراتۋراسى تومەندەيدى, جاۋىن-شاشىن تۇسەدى. جالپى, ءبىز قىركۇيەكتىڭ 29-ى, ياعني, الداعى دۇيسەنبىدەن جىلۋ بەرۋ ماۋسىمىن باستاۋعا دايىنبىز» دەدى ۆاسيلي كرىلوۆ.
وسىدان كەيىن اۋدان اكىمدەرى كەزەك-كەزەك سويلەپ, وزدەرىنە قاراستى تۇرعىن ۇيلەر مەن الەۋمەتتىك نىسانداردىڭ جاي-كۇيىن, ونداعى ماسەلەلەردى جانە جۇزەگە اسقان جوبالارى تۋرالى باياندادى. بىراق ءالى دە اتقارىلماعان جۇمىستاردىڭ بار ەكەنىن اڭعاردىق. كەيبىر جاۋاپتى مەكەمەلەر سول جاعالاۋداعى ازداعان تۇرعىن ءۇيدى قىسقى ماۋسىمعا تولىقتاي دايىنداپ ۇلگەرمەي جاتىر ەكەن. الايدا, بۇل كۇنى تەحنيكالىق جانە قارجىلاي كومەكتىڭ ۋاقتىلى بەرىلىپ تۇرعانىنا بايلانىستى موينىندا مىندەتى بارلاردىڭ سىلتاۋ ايتاتىن ەش رەتى جوق ەكەنىن ءبارىمىز بىلەمىز.
جيىن سوڭىندا ەلوردا اكىمى يمانعالي تاسماعامبەتوۆ حالىق اراسىنان قويىلعان سۇراقتارعا ناقتى جاۋاپ بەرىپ, بۇقارانىڭ بوران مەن ايازدان قورقاتىن ءجونى جوق ەكەنىن جەتكىزدى. ونىڭ سوزىنە قاراعاندا, الەۋمەتتىك سالاداعى 170 نىساننىڭ 103-ىنە جىلۋ بەرىلدى. ال ءدۇيسەنبىدەن باستاپ ەلوردانىڭ بارلىق بالاباقشالارىنا, مەكتەپتەرىنە, دەنساۋلىق ساقتاۋ نىساندارىنا جىلۋ بەرىلەدى.
«ەلوردادا الەۋمەتتىك سالانىڭ بىرقاتار نىسانىنا جىلۋ بەرىلدى. ناقتىراق ايتسام, قازىردىڭ وزىندە استانا قالاسىنداعى 29 دەنساۋلىق ساقتاۋ نىسانىنىڭ 14-ىنە جىلۋ بەرىلە باستادى. بۇل – 48 پايىزدى قۇرايدى دەگەن ءسوز. ال 64 بالاباقشانىڭ 51-ءى, 57 مەكتەپتىڭ 28-ءى جىلۋ بەرۋ جۇيەسىنە تولىعىمەن قوسىلدى.
بىراق, ءبىز قازىر ءبارىن جاقسى دەپ كەتكەنمەن, ەرتەڭ-اق تەحنيكالىق اقاۋلار پايدا بولىپ, ۇلكەن ماسەلە تاۋىپ بەرۋى عاجاپ ەمەس. سوندىقتان كەز كەلگەن مەزگىلدە قول قۋسىرىپ قاراپ وتىرۋعا بولمايدى. ويتكەنى, استانانىڭ قىسى بارىمىزگە ءمالىم: بىرنەشە كۇن بويى 35 گرادۋستان تومەن اياز ساقتالۋى مۇمكىن» دەدى يمانعالي تاسماعامبەتوۆ.
قازىرگى ۋاقىتتا ورتالىقتان جىلىتىلاتىن 2115 كوپپاتەرلى تۇرعىن ءۇيدىڭ 2086-سىندا الداعى جىلۋ بەرۋ ماۋسىمىنا دايىندىق جۇمىستارى اياقتالعان. قورىتىندىسىندا, الماتى اۋدانى 100 پايىزدىق كورسەتكىشپەن قىسقا دايىن بولسا, ەسىل اۋدانى – 93, ال سارىارقا اۋدانى 98,1 پايىز دايىن.
نۇريسلام قۇسپانعالي
