باستى اقپاراتقالا مەن سالا

جىلى ايالدامالار قاتارى ارتا ما؟

استانادا «اقىلدى قالا» جوباسى اياسىندا جۇرگىزىلىپ جاتقان باستاما اياسىندا ورناتىلعان جىلى ايالدامالارعا سۇرانىس ۇلكەن. ويتكەنى قىتىمىر ايازدا دالادا توڭىپ تۇرعانشا, جىلى ايالدامادا كۇتكەنگە نە جەتسىن؟! ونىڭ ۇستىنە, قوعامدىق كولىكتەر دە ۋاقىتىلى كەلە قالسا مەيلى عوي. كەي كەزدە 20 مينۋتتان 50 مينۋتقا دەيىن اۆتوبۋس­تى كۇتۋگە تۋرا كەلەدى. قىسقاسى, قىس اۋاسىندا ەلوردالىقتاردىڭ كوڭىلىن اۋلايتىن جىلى دا جايلى ايالدامالار كوپتەپ كەرەك-اق, بۇل ىسكە اسا ما؟

بايقوڭىر اۋدانىنىڭ تۇرعىنى ايزات يبراگيموۆا كۇندەلىكتى جۇمىسقا قوعامدىق كولىكپەن قاتىنايتىنىن ايتتى.

– ا.پۋشكين كوشەسىندە «ەسكەك ەسۋ كانالى» دەگەن ايالداما بار. ءبىزدىڭ ۇيگە 40-50 مەتر عانا. الايدا سۋىق كۇندەرى ورتالىققا قاتىناۋ ءۇشىن بۇل ايالداماعا بارمايمىن. بىرىنشىدەن, №30 جانە №60 اۆتو­بۋستىڭ جيىلىگى تىم ۇزاق. ەكىنشىدەن, اشىق ايالدامادان توڭىپ قالاسىز. سول سەبەپتى 500-600 مەتر جەردەگى «تسەليننىي» ايالداماسىنا بارامىن. ويتكەنى وندا جىلى ايالداما بار, سوسىن اۆتوبۋس نەشە مينۋتتا كەلەتىنىن كورسەتىپ تۇراتىن مونيتور بار. بۇل ايالدامادان №18 جانە №28 اۆتوبۋس ورتالىققا قاتىنايدى, – دەدى قالا تۇرعىنى.

قالا تۇرعىندارىن الاڭداتاتىن جىلى ايالداما ماسەلەسى استانا قالاسى ءماسليحاتىنىڭ كەزەكتەن تىس سەسسياسىندا نازاردان تىس قالمادى. بۇل سۇراققا كولىك جانە جول-كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپارباەۆ جاۋاپ بەردى. ونىڭ سوزىنشە, 2022 جىلى مەملەكەتتىك ساتىپ الۋ كونكۋرسىنىڭ قورىتىندىسىمەن «ەكوپروم پاۆلودار» جشس 40 دانا كوپفۋنكتسيونالدى جىلى ايالداما ورناتۋعا مىندەتتى بولسا, سونىڭ 28-ءىن عانا ىسكە قوستى. ونىڭ ءوزى ستاندارتقا ساي بولماي, ءالى كۇنگە دەيىن ەسىگىندە قۇلىپ تۇر.

باسقارما باسشىسى مەردىگەر كومپانيانى سوتقا بەرگەنىن, سوت پروتسەسى اياقتالماي, جىلى ايالدامالاردى ىسكە قوسۋ مۇمكىن ەمەستىگىن ءتۇسىندىردى.

2015 جىلدان باستاپ استانا قالاسىندا جىلى ايالدامالار سالىنا باستادى. بۇگىندە جايلى دا جىلى ايالدامانىڭ سانى 162-گە جەتتى. ەگەر ەلوردادا 1091 ايالداما بار ەكەنىن ەسەپكە الاتىن بولساق, بۇل سان از با, كوپ پە, باعامداۋ قيىن ەمەس سەكىلدى.

جابىق پاۆيلوندار قالانىڭ ايالداما بەكەتىندەگى جولاۋشى اعىنىنا تالداۋ جۇرگىزۋ نەگىزىندە جابدىقتالادى. ياعني الەۋمەتتىك ماڭىزى بار نىسان – ءبىلىم بەرۋ جانە دەنساۋلىق ساقتاۋ ۇيىمدارىنىڭ بولۋى ەسكەرىلەدى. بۇل تۋرالى بايقوڭىر اۋدانى ينفراقۇرىلىم ءبولىمىنىڭ باسشىسى توقتار حاسەنوۆتەن سۇرادىق.

– بايقوڭىر اۋدانىنىڭ اۋماعىندا 211 ايالداما بار. ونىڭ 34-ءى جىلى ايالداما بولسا, 18-ءى ءبىزدىڭ بالانستا, 10-ى ينۆەستوردىڭ ەسەبىمەن سالىندى. كولىك جانە جول-كولىك ينفراقۇرىلىمىن دامىتۋ باسقارماسىنىڭ مەنشىگىنە 7 ايالداما كىرەدى. جالپى جىلى ايالدامالار ادام قوزعالىسى جوعارى, الەۋمەتتىك نىساندار شوعىرلانعان اۋماقتاردا ورناتىلۋدا. بۇل باعىتتاعى جۇمىستى جالعاستىرىپ, ايالدامالاردى كۇتىپ ۇستاۋ مەن قاۋىپسىزدىگىن ارتتىرۋ مىندەتى تۇر. وسى باعىتتا بايقوڭىر اۋدانى اكىمدىگى ءوز بالانسىنداعى 18 جىلى ايالداماعا 36 بەينەباقىلاۋ كامەراسىن ورناتىپ, ايالداماداعى ءتارتىپ پەن قاۋىپسىزدىكتى باقىلاۋدى جولعا قويدى, – دەدى ول.

وتكەندە قوعام بەلسەندىسى بەردىبەك حاباي ءوزىنىڭ الەۋمەتتىك جەلىدەگى پاراقشاسىندا جىلى ايالدامالار ماسكۇنەم ءۇشىن جاتار ورىنعا اينالدى دەپ دابىل كوتەرىپ:

– ارقادا اياز قاhارىنا مىنگەن كەزدە ەسكى كولىگىمنىڭ موتورى ىستەن شىعىپ, قوياندىدان جۇمىسقا اۆتوبۋسپەن قاتىنايتىندى شىعاردىم. جۇرگەن جەرىمدە جىلى ايالداما ىزدەيتىن ادەت پايدا بولدى. قايسىسىنا كىرسەم دە كۇلىمسى ءيىس قولقانى قابادى. كەيبىرىنەن شىداي الماي شىعىپ تا كەتتىم. وتكەندە تاڭەرتەڭگى ساعات 7-دە «شاپاعات» ايالداماسىنا كىرسەم, بىرەۋ ۇيىقتاپ جاتىر. ايالدامانىڭ ىشىندەگى يىستەن دەم الا الماي, تىسقا شىعۋعا اسىقتىم. جىلى ايالدامادا جاعىمسىز ءيىس بولسا دا, بالاسىن جەتەكتەگەن انا مەن قارت اپا قالدى. قايتسىن, ايازدان توڭىپ قالماۋ كەرەك, – دەپ جازدى.

جىلى ايالداماداعى مۇنداي جاعىمسىز فاكتىلەردى جوققا شىعارا المايمىز. دەمەك, جىلى ايالدامالاردىڭ سانىن كوبەيتۋمەن قاتار, ونداعى تازالىق پەن قاۋىپسىزدىكتى ارتتىرۋ مىندەتى تۇر.

تاعىدا

نۇرلات بايگەنجە

«استانا اقشامى» گازەتىنىڭ ءتىلشىسى

ۇقساس جاڭالىقتار

پىكىر ۇستەۋ

Back to top button