Кеше Конгресс-холда Қазақстан Республикасының «Ардагерлер ұйымы» қоғамдық бiрлестiгiнiң құрылуына 25 жыл толуына байланысты салтанатты мереке болып өттi. Жиынды ашқан Мемлекеттiк хатшы Мұхтар Құл-Мұхаммед Елбасының ардагерлер қауымына арнаған құттықтауын оқып бердi.
«Ардақты ардагерлер! Сiздердi айтулы оқиға – Республика ардагерлерi ұйымының құрылуының 25 жылдығымен құттықтаймын. Ең алдымен барлық ардагерлерге шынайы ризашылығымды бiлдiргiм келедi. Аға ұрпақтың еңбегiн толықтай бағалау қиын. Сiздердiң көпшiлiгiңiздiң жастық шақтарыңыз Ұлы Отан соғысының сұрапылына тап келгендiктен, майдан далаларында ерлiк пен қаһармандықтың үлгiсiн көрсете жүрiп шайқасып, Ұлы Жеңiстi жақындаттыңыздар. Соғыстан кейiнгi халық шаруашылығын қалпына келтiру жылдары да оңай болған жоқ. Сiздер ол мiндеттi де үлкен абыроймен орындап шықтыңыздар», – деген Елбасы лебiзi ардагерлердiң мерейiн тасытты.
Құттықтау хатпен қоса Халық қаһарманы Сағадат Нұрмағамбетов бастаған бiрнеше ардагерге «Алғыс грамоталары» табысталды.
Мерейтойлық шара «Ардагерлер ұйымы» республикалық қоғамдық бiрлестiгi төрағасының орынбасары Бекболат Мұқышевтiң баяндамасымен жалғасты. Оның баяндауынша, 1987 жылы құрылған ардагерлер бiрлестiгi ел үшiн маңызы зор көптеген шаруалардың басы-қасында жүр. Оның iшiнде жастарды отансүйгiштiкке баулуда, адамгершiлiкке тәрбиелеу iсiнде, Отанымыздың көрнектi тұлғаларын дәрiптеуде ерен еңбек сiңiрiп, үлкен белсендiлiк танытатын бiрден-бiр ұйым – осы ардагерлер бiрлестiгi. Соңғы жылдарда бiрлестiктiң күшiмен Ұлы Жеңiстiң мерейтойлары мен республикалық ардагерлер ұйымдарының атаулы күндерiне арналған 5 кiтап жарық көрдi. Қазiр бұл ұйымда 730 мыңнан астам ардагер бар. Олардың екi мыңы – Қазақстанға еңбегi сiңген қайраткерлер. Төртеуi – Халық қаһарманы.
Ардагерлердi құттықтауға Парламент Мәжiлiсiнiң депутаты Дариға Назарбаева, Денсаулық сақтау министрi Салидат Қайырбекова, Еңбек және халықты әлеуметтiк қорғау министрi Гүлшара Әбдiхалықова, Астана қаласы әкiмiнiң орынбасары Аида Балаева және басқа да лауазымды тұлғалар келдi.
Жиын соңы өнер майталмандарының дайындаған мерекелiк концертiне ұласты.
Шынар ӘБIЛДА
