АРДАГЕРЛЕР ТІЛЕГІН АЙТТЫ
Сарыарқа ауданының Ардагерлер кеңесі және М.Өтемісұлы атындағы Оқушылар сарайының ұйымдастыруымен «Қош келдің, әз Наурыз» атты мерекелік кеш өтті.
«Мерекелік бағдарламаның мақсаты – жастарымызды қазақ халқының мәдени мұрасымен сусындату, оларды отансүйгіштік пен адамгершілік қасиетке тәрбиелеу және кейінгі буын мен ақылман қариялар арасындағы байланысты жалғастыру», дейді Сарыарқа аудандық Ардагерлер кеңесінің Жастар ісі мен мәдениеті жөніндегі комиссиясының төрайымы Ғалия Құсайынқызы.
Кеш «Нұр себелер Ұлыстың Ұлы күні» тақырыбындағы қойылыммен ашылып, ақсақалдардың ақ батасымен жалғасты. Содан соң әдет-ғұрып бойынша Қыдыр ата келіп жиналғандарға жылы тілегін арнады. «Болашақ» ансамблі күмбірлете күй шертіп, «Домбырамен ән айту» үйірмесінің тәрбиеленушілері тамылжыта ән салды. Сонымен қатар, «Бәйтерек» бишілер тобы мың бұрала би билеп, көрермендердің ықыласына бөленді. «Арман» шеберлік мектебінің шәкірттері қазақтың ұлттық ойындарын ұйымдастырып, кештің көрігін қыздыра түсірді.
Осылайша оқушылардың өнерін тамашалаған ардагерлер концерт соңында өз өнерлерімен де бөлісті.
Қызғалдақ ҚЫДЫРБЕК,
Қ.А.Ясауи атындағы
ХҚТУ-дың студенті