АРДАГЕРЛЕРГЕ ҚҰРМЕТ БЕЛГІСІ
Астанада Ұлы Отан соғысы ардагерлеріне арналған атаулы тақтайшалар орнатыла бастады. Майдангерлердің аты-жөні жазылған тақтайшалар Сарыарқа ауданындағы 67 соғыс ардагерінің үй іргесіне ілінеді.
Жеңістің 71 жылдығына арналған тағылымды шараның ұйытқысы болған – Астана қаласының мәслихаты мен Қалалық ардагерлер кеңесі.
– Бұл ой үйдің қасынан өтушілер мұнда кім тұратынын біліп жүрсін деген ниеттен туындады. Ардагерлердің ерлігіне тағзым ретінде жасалған мұндай акциялар жастарды патриоттыққа тәрбиелейді, – дейді Астана қаласы Сарыарқа ауданына қарасты Ардагерлер кеңесінің төрағасы Ебенғаппас Ахметов.
Атаулы тақтайшаның алғашқысы ардагер Фролов Алексей Федоровичтің үйіне ілінді. Қонақтарды қуана қарсы алған ол игі бастамаға разылығын білдіріп, «Жастарға оқуды терең меңгеріп, жақсы әскери білім алуды тілеймін, сағымыз ешқашан сынбасын!» деген батасын берді.
Қалалық және аудандық Ардагерлер кеңестері Ұлы Отан соғысы ардагерлеріне белсенді қолдау көрсетуде. Алдағы уақытта мұндай тақтайшалар Астанадағы барлық ардагердің үйіне орнатылмақ.