Елорданың дамуы жөнінде өткізілген кеңесте Елбасы жастардың бос уақытын тиімді өткізуді қолға алу керектігін тапсырған болатын. «Бізге аула клубтары қажет. Себебі, мұндай бірлестіктер жастардың өмірдегі өз жолын айқындауға жол ашады. Тіпті, әлемге белгілі айпадтарды шығарушы Стив Джобс өнертапқыштығын аула клубында достарымен бірге бастаған деседі. Сондықтан, бізге де мектептер мен колледждерде осындай клуб ашу керек» деген Нұрсұлтан Назарбаев сабақтан тыс уақытта осындай клубтардың жұмысын жандандыру ісіне айрықша мән берген.
Бүгінгі таңда Интернациональный кентінде балалар мен жасөспірімдердің «Армандастар» клубы жұмыс істеп жатыр. Оған 200-ден аса бала барып жүр. Клубтың ашылуына сол жердің тұрғындары, олардың ішінде ардагер Қожантай Байкенов бастамашы болып еді.
Ол Астана қалалық мәслихатына №25 округтен сайланған депутат Төкен Егінбаевтың қабылдауында болып, қаланың шеткері тұрғын алабында балаларға не ересектерге арналған мәдени ошақтың жоқтығын айтты. Ал, жалғыз мектептің ондайға мүмкіндігі шектеулі, сондықтан «Ескендір» тұрғын үй кешенінде бос жатқан жертөленің барын, соны жөндеп беретіндей демеуші азамат болса деген тілегін жеткізді.
Төкен Жылқыайдарұлының айтуынша, кент тұрғындары аула клубына аса зәрулігін өздерінің белсенділігімен көрсете алды. Мәселен, Азамат Кәрімов деген спортшы жігіт балаларды спортқа баулуға құлшынып тұрғаны қуантты. Сабақты ине сәтімен деп, істің тез шешілуіне Алматы ауданы Интернациональный тұрғын алабындағы ардагерлердің бастауыш ұйымының төрайымы Майра Әлімханқызының сол орталықты егде жандар мен балаларға ортақ қылсақ деген ұсынысы қозғау салды.
Қалалық мәслихаттың депутаты, «Құлагер» құрылыс корпорациясының басқарма төрағасы Төкен Егінбаев екі сөзге келмей, «Ескендірдегі» 400 шаршы метр әйдік жертөлеге күрделі жөндеу жасап, жарық, жылуына дейін өткізіп берді.
Әкімдік тарапынан да қолдау табыла кетіп, Жастар саясаты мәселелері басқармасының араласуымен, неше түрлі жабдықтар мен спорттық құралдар алынып жатыр.
«Әлі толықтай жабдықталмағанына қарамастан, бос селтеңдеп жүрген балалар бірден қызықты ортаға ағылды. Мұнда қазақша күрестен бастап, бокс, каратэ, таэквондо, домбыра, би үйірмелері жұмыс істей бастады. Дойбы, шахмат, тоғызқұмалақ сияқты ой еңбегіне баулитын жаттықтырушы да табыла кетті. Тағы да қосымша ұсыныстар түсіп жатса, қол ұшын беруден тартынып қалмаймыз» дейді Төкен Жылқыайдарұлы.
Ал, ардагерлер бастауыш ұйымының төрайымы Майра Әлімханқызы:
«Ардагерлер болған соң, біз тікелей осы жердегі жастармен, мектеппен тығыз байланыстамыз. Іргеміздегі №42, 43, 44 мектептерде жиі-жиі кездесулер өтіп тұрады. Кеше ғана мектеппен бірлесіп бір іс-шара өткіздік.
Біздің осындай кең жерге келіп, арқа-жарқа болып жатқанымыздың барлығы мәслихат депутаты Төкен Жылқыайдарұлының арқасы. Ардагерлер мұндай жақсылықты ұмытпайды. Өйткені, бөлмеміз тегін. Іші жылы, жарық, кең. Бұл жерде біз тұсаукесер, батыр аналармен басқосу, спорттық шараларды үзбей өткізіп тұрамыз деп ұйғардық. Айта кетерлігі, ардагерлеріміз белсенді. Мысалы, биыл қала бойынша шаңғыдан жарыс өтті. Жетпістің жотасына шыққан қариямыз екінші орынды қанжығасына байлады. Осының өзі кейінгі буынға деген тәрбие, үлгі өнеге» дейді.
Бүгінде үйірменің көпшілігі – ақылы. Ал, баласын қалтасынан ақша шығарып, қосымша біліммен қамтамасыз етуге кез келген ата-ананың шамасы жете бермейді. Ал, «Армандастар» клубындағы үйірмелер тегін, сондықтан да болар балалардың ықыласы ауып, жаңа ортаға тез үйірсектеніп кетті.
