Жастар сарайында өткен мерекелік концерт ардагер аналардың құрметіне арналды. Елордалық өнерпаздар аяулы жандарды көктемнің шуақты мерекесімен құттықтап, ән мен жырдан шашу шашты.
Бұл күні сахна төрінде «Наз» би театрының бишілері мың бұрала билесе, театр және цирк әртістері поэтикалық миниатюраларын ұсынды. Ардагерлерден құралған хор мен «Voice-Art», «Радуга», «Ангиорс», «Номад» және «Сарыарқа» балалар ұжымдары да түрлі музыкалық сәлемдерін жолдады.
Елімізге еңбегі сіңген қайраткер Александр Абылаев жетекшілік ететін эстрадалық-симфониялық оркестрдің орындауындағы әуендер көпшіліктің құлақ құрышын қандырды. Рухани кешке жиналған қауым «А в городском саду играет…» әуеніне вальс билеп, мерекенің көрігін қыздырды.
«Астана қаласында жетпіс мыңға жуық ардагер бар.
8 наурыз – әйелдер мерекесі және Наурыз мейрамы қарсаңында оларға әдемі кеш ұйымдастырғанды жөн көрдік. Елордалық өнерпаздардың қатысуымен өткен мерекелік концерт жоғары деңгейде өтті. Ардагерлердің құрметіне арнап мұндай шараларды өткізу игі дәстүрге айналып келеді» дейді Астана қаласы Ардагерлер кеңесінің төрағасы Сансызбай Есілов.
Гүлмира ШАРХАНҚЫЗЫ
