Қазақстан Республикасының Тұңғыш Президенті күні «Қазақстан» орталық концерт залында үлкен мерекелік концерт өтті.
Жасынан халық әндерінің қайнарынан сусындап өскен Елбасының мерекелік күніне орайластырылған салтанатты шара Қарақат Әбілдинаның орындауында халық әні «Илигаймен» ашылды. Сондай-ақ, Айгүл Қосанова, Ардақ Балажанова, «МузАРТ» ансамблі, «Бәйтерек» тобы секілді елімізге белгілі эстрада жұлдыздары да ән шырқады. Бұл кеште халық әндерімен қоса Нұрсұлтан Әбішұлының сөзіне жазылған Алтынбек Қоразбаевтың «Үшқоңыр», «Сарыарқа» секілді танымал әндері де халық назарына ұсынылды. Ал, Ресей, Белоруссия, Армения, Өзбекстан, Башқұртстан, Қырғызстан мемлекеттерінен осы мерекеге арнайы келген өнер жұлдыздары Астана қаласының «Сазген сазы» эстрадалық-симфониялық оркестрінің сүйемелдеуімен қазақтың халық әндерін қазақ тілінде шырқап, көпшілік қошеметіне бөленді. Молдавия мемлекетінің халық әртісі Константин Москович молдаван елінің ұлттық аспабына халық әндерін салып, жиналған қауымды тамсандырды. Ол қазақ халқына және оның Көшбасшысы Нұрсұлтан Назарбаевқа деген ілтипатын қазақ тілінде жеткізді.
Елбасының және оның замандастарының сүйіктісіне айналған «Команда молодости наши» әнін Қайрат Баекенов орындап, өткен күндерге шегініс жасады. Сондай-ақ, Елбасының өмірінен сыр шертетін деректі фильм көрсетілді.
Хамит ЕСАМАН
