Асқақтаған «Астана жұлдызы»
Астана күні қарсаңында ұйымдастырылған айтулы іс-шаралар баршылық. Түрлі байқауларда бабы келіссе де, бағы жанбай қалған үміткерлер мойыған жоқ. Құлады, жүрді. Жылады, күлді. Құлауы мен жылауына сын сағаттағы сәтсіздік, жүруі мен күлуіне елорда тойының ерекшелігі себепші болды. Тартуы көп тойға тәнті болып, тәубе етуден басқа не керек?!.
Мамандарды марқайтқан байыпты байқау – америкалық «Грэмми» сыйлығы үлгісінде өткен «Астана жұлдызы» ұлттық музыкалық бәйгесі болды. Отандық кәсіби музыканттардың 2012 жылдың қаңтарынан 2013 жылдың мамырына дейінгі шығармашылық жетістіктерін сарапқа салған атаулы сыйлыққа Астана қаласы әкімдігінің өзі бастамашы болғандықтан, сайдың тасындай сарапшылар да ардан аттап, абыройды таптаған жоқ. Олар әншінің үнтаспасы сақталған арнайы дауыс беру парақшасын жасақтап, 15 жылдықта 15 номинация бойынша 15 үздікті анықтады.
«Қазақстан» орталық концерт залында жайылған қызыл кілемше үстімен жүріп өткен кіл мықтының ішінен бір мықшегенің шықпауы әсте мүмкін емес. Сондықтан жалпы 45 қатысушыдан жалқы 15 жеңімпаздың іріктеліп алынуы – заңдылық. Әсіресе, ұлттық әуендерге аса көңіл бөлініп, туындыларды бағалауда World Music Awards өнер додасының технологиясы қолданылды. Содан сүрінбеген Маржан Арапбаева «Қыздар арасындағы үздік орындаушы» аталымына лайық деп танылса, «Үздік композиторда» – Талғат Сарыбаев, «Жаңа тыныс» аталымында – Әли Оқапов, «Үздік дуэтте» – «Мюзикола», «Үздік этно-топта» – «Ұлытау», «Үздік әйелдер тобында» – «Кеш you», «Үздік ерлер тобында» – «МузАрт» жеңімпаз болды. Ал, «Жігіттер арасындағы үздік эстрада орындаушысы» – Жұбаныш Жексенұлы, «Үздік өңдеуші» – Виктор Аленко, «Үздік мәтін авторы» – Фариза Оңғарсынова, «Үздік концерттік шоу» – Роза Рымбаева, «Ең стильді әнші» – Лидо, «Үздік би тобы» – «Виват» тобы десек, «МузАрт» орындайтын «Қазақтай ел қайда» әні «Жыл әні» ретінде алға шықты. Өз кезегінде «ХитТВ» телеарнасы да «Орда» тобына арнайы сыйлық пен арнада тегін ротация жасау мүмкіндігін берді.
Музыка сыйлығын тапсыру кезінде «Қазақстан» орталық концерт залы сахнасында отандық эстрада әншілері Маржан Арапбаева, Нұрлан Абдуллин, Толқын Забирова және «Орда», «Кеш you», «Ringo», «Музарт» топтары өнер көрсетті. Ал, гала-концерт хэдлайнері ретінде арнайы шақырылған, әлемге әйгілі әнші Джамала теңдессіз талантымен қайталанбас музыка мерекесін асқақтата түсті.
Еркеғали БЕЙСЕНОВ