Ертең «Астана-2013» халықаралық авторлық ән фестивалінің шамдары кезекті рет елорда төрінде жағылады. Үш күн бойы ТМД және еліміздің аумағынан жиналатын бардтар осынау өнерге қызығатын жұртты өз әндерімен сусындатпақ. Кеше өткен баспасөз мәслихатында осы және басқа да фестиваль аясындағы шаралар туралы фестивальді ұйымдастыру комитетінің төрағасы Мақсат Сәрсенбеков пен фестивальдің техникалық директоры Илья Логвиненко баяндады.
Астана – Қазақстанның бас қаласы атанғалы осымен 15-рет өтетін фестивальге авторлық ән өнерінде мойындалған Валерий және Вадим Мищуктер, Андрей Козловский, Лидия Чебоксарова, Евгений Быков, Александр Родовский қатысады деп күтілуде. Олардың бәрі Ресей астанасынан келмек. Мәскеуде тұратын қандасымыз, фестивальден бірде-бір рет қалмаған Жеңіс Ысқақов музыкалық шараны ашып береді. Әрі қарай фестивальге арнайы шақырылған 200-дей бард пен бұл өнерге таласы бар, өз еркімен келген өзге авторлар әндерін көпшіліктің назарына ұсынады.
Бұрын фестиваль шеңберінде екі кезеңнен тұратын байқау ұйымдастырылса, биыл ол өткізілмейтін болды. Осы жылғы фестивальдің бір ерекшелігі сол. Тек қана шеберлік сабақтарын, шығармашылық шеберханаларды өткізу арқылы деңгейі жоғарырақ Самарадағы Валерий Грушин атындағы және Санкт-Петербургтегі «Питер аккорды» фестивалдеріне іріктеу жүргізілмек.
Ұйымдастырушылардың айтуынша, биыл он бесінші рет өткізілетіндіктен, фестиваль бағдарламасы қызықтарға толы болмақ. Қазіргі таңда оның өтетін орны – Қарағанды тас жолының 17 шақырымындағы «Причал» қонақ үйі аумағында дайындық жұмыстары жүруде. Ол жер абаттандырылып, сахна орнатылуда. Сондай-ақ, қонақтарға арналған 200-дей шатыр тігілуде. Бір сөзбен айтқанда, фестивальге қатысушылар мен оны тамашалаушылар үшін барлық жағдайлар жасалып жатыр.
Аманғали ШМИТҰЛЫ
