АСТАНА ӘКІМІ КОММУНАЛДЫҚ ҚЫЗМЕТТЕРДІҢ ЖҰМЫСЫН БАҚЫЛАУДЫ КҮШЕЙТТІ
Кеше Астана қаласы әкімі Әділбек Жақсыбековтің төрағалығымен кезекті аппарат жиналысы болды.
Елорда басшысының тұрғындардан келіп түскен өтініш-тілектерді жеке бақылауына алғандығы туралы осыған дейін хабарланған болатын. Өтініш-тілектердің басым бөлігі қала аумағындағы ашық жатқан құдықтар мен жол қозғалысы бөліктерінің сапасына қатысты. Қала басшысы бұл жағдайды тез арада қалыпқа келтіруді тапсырғанымен, тиісті шаралар атқарылмаған. Осыған байланысты бүгін қала әкімі Алматы және Сарыарқа аудандарының әкімдеріне, сонымен қатар қаланың коммуналдық шаруашылық басқармасының басшысына ескерту жасады.
Ә.Жақсыбеков қаланы азық-түлікпен қамтамасыз ету мәселесіне баса назар аударып, азық-түлік бағасының өсуіне жол бермеу жөнінде кешенді іс-шаралар жоспарын әзірлеуді және қаланың азық-түлік инфрақұрылымын салуды тапсырды.
Аудан әкімдерінің коммуналдық қызметтердің дайындығы туралы баяндамаларын тыңдап, қыс кезінде кәсіпорындардың жұмыс істеу кестесінің сақталуына бақылауды күшейтуді, сонымен қатар, қала аумағында қар жинауды уақтылы қамтамасыз етуді тапсырды.
Қала басшысы барлық қалалық қызметтерден сеніп тапсырылған нысандардың техникалық жағдайына және қыста жұмыс істеу кестелерін сақтауына бақылауды күшейтуді, қарды жинап, уақтылы шығару бойынша механикаландырылған бригадалардың технологиялық тәсімдері мен жұмыс кестелерін оңтайландыруды талап етті.
– Бүгін қаралған мәселелер өте маңызды әрі бақылау жасап, жедел шешім қабылдауды қажет етеді. Қалалық шаралар мен кәсіпорындар басшыларының барлығы менің тапсырмаларымды сапалы және уақтылы орындамағандары үшін жеке жауап беретін болады, – деп атап өтті Ә.Жақсыбеков.
Қала басшысы Елбасының «Нұрлы жол – болашаққа бастар жол» атты Қазақстан халқына Жолдауында белгіленген міндеттерді жүзеге асыруға ерекше назар аударды. Онда Астанаға инфрақұрылымды жақсартып, қаланың индустриялық әлеуетін дамыту жөніндегі ауқымды міндеттер қойылды.