АСТАНА БЮДЖЕТ ДОНОРЫНА АЙНАЛАДЫ
Астанада ағымдағы жылы жалпы өңірлік өнім 5,9%-ға ұлғайды. Елорданың 2015-17 жылдарға арналған бюджет жобасында негізгі мемлекеттік бағдарламаларды жүзеге асыруға қаржы қарастырылған, сонымен қатар, 2015 жылдан бастап Астана республикалық бюджет донорларының бірі болады.
Жақында құрылыс, экология, көлік, сауда және тұрғын үй-коммуналдық шаруашылық мәселелері жөніндегі қалалық мәслихаттың тұрақты комиссиясы жекелеген әкімшілік бюджеттік бағдарламалардың 2015-2017 жылдарға арналған бюджет жобасын талқылады.
Қалалық мәслихаттың баспасөз қызметінің мәлімдеуінше, жалпы, жаңа үш жылдық бюджетті қалыптастыру барысында ескерілген индикаторлар елімізді дамыту стратегиясын жүзеге асырумен тығыз байланысты. Осындай базалық бағдарламалар қатарына үдемелі индустриялық-инновациялық, «Тұрғын үй шаруашылығы кешенін модернизациялау және дамыту» және «Бизнестің жол картасы – 2020» бағдарламаларын қосуға болады.
Астана қаласының әлеуметтік-экономикалық дамуын болжау негізінде бюджет түсімдерін болжамдау әдістемесіне сәйкес 2015-17 жылдары жергілікті бюджет кірісіне болжау жасалды. Жергілікті бюджет кірісінің 90%-ын салық түсімдері құрайды.
Елорданың әлеуметтік-экономикалық дамуын болжау аясында жалпы өңірлік өнім көлемі ұлғайып, бөлшек сауда айналымының және өнеркәсіптік өнім көлемі артады деп күтілуде. 2015 жылдан бастап Астана республикалық бюджет донорларының бірі болады. Комиссия отырысында бюджеттік бағдарламалар әкімшілерінің – энергетика және коммуналдық шаруашылық басқармасы, жолаушылар көлігі және автомобиль жолдары басқармасы, құрылыс басқармасының негізгі көрсеткіштері қаралды.
Сағи ОРАЛ