АСТАНА МАРАФОНЫНА 4500 АДАМ ҚАТЫСУДА
Айтулы «Астана марафоны – 2016» жарысы «Ханшатырдың» түбінен басталды. Марафонға қатысу үшін елордаға әлемнің 25 елінен спортшылар келді.
Жарыс жолын көпшілікпен бірге ҚР Премьер-Министрі Кәрім Мәсімов, Президент аппаратының басшысы Әділбек Жақсыбеков және Олимпиада жеңімпаздары Серік Сәпиев, Александр Винокуров, Данияр Елеусінов, Гюзель Манюрова, Елдос Сметов бастады.
Әлем көз тіккен марафон кезінде желаяқтар Бейбітшілік және келісім сарайы, Әзірет Сұлтан мешіті, Бәйтерек, Назарбаев университеті, «Астана-Арена» стадионы секілді қаланың ең көрікті жерлерінен жүгіріп өтеді. Қатысушылардың арасында АҚШ, Франция, Италия, Жапония, Австралия, Германия, Иран, Ирландия, Бельгия, Ресей, Бразилия, Эстония, Қытай, Оңтүстік Корея, Түркия, Канада, БАӘ, Нидерланды сияқты елдердің спортшылары бар.
Бұл марафонның ең ұзақ межесі – 42,2 шақырым. Одан кейінгі белгіленген қашықтық - 21,1 шақырым. Ал үшінші қашықтық 10 шақырымды қамтиды. Оған қоса, қатысушылар скандинавиялық жүруден жарысады.
21,1 километрді еңсергендерге ҚР спорт шебері атағы беріледі.
Желаяқтарға әр 5 километр сайын сумен және бананмен жүрек жалғап алуы үшін жағдай жасалған. Ал ең алыс жолға жүгіретіндерге изотоникалық сусын ұсынылады.