Астана мектептерінде 27 мыңнан астам орын тапшылығы бар
![](https://www.astana-akshamy.kz/wp-content/uploads/2024/08/285234zeshhz-780x470.jpg)
Бұл туралы педагогтар форумында Астана қаласы Білім басқармасының басшысы Қасымхан Сенғазыев айтты, деп хабарлайды astana-akshamy.kz
Оның дерегінше, бүгінгі таңда елорлада 187 мектеп бар, онда 282 150 оқушы оқиды. Оның ішінде 110 мектеп – мемлекеттік , 70 мектеп – жеке және 7-еуі – республикалық .
Жаңа 2024-2025 оқу жылында жалпы білім беретін мектептердің бірінші сыныбына 28 мың бала қабылдау жоспарланып отыр. Қазіргі таңда 24 100 бала қабылданды. Мектептердегі тапшылық — 27 800 мың оқушы орны. Осы мәселені шешу үшін биыл екі ауысымда 100 мыңға жуық оқушы орнына 32 нысанның құрылысы жүргізілуде. Оның ішінде жыл соңына дейін 20-дан астам мектепті пайдалануға беру жоспарланған, – деді Қасымхан Сенғазыев тамыз форумында.
Қыркүйекте бір ауысымда 15 850 мың орынға арналған 12 мектеп пайдалануға беріледі.
Осылайша, биыл жыл соңына дейін үш ауысымда оқитын 6 мектептің, бала саны шамадан тыс 9 мектептің мәселесі шешілді. Ал үш ауысымда оқитын 2 мектептің және бала саны шамадан тыс 7 мектептің орын тапшылығы мәселесі 2025 жылы шешіледі, – деді Білім басқармасының басшысы.
Сонымен қатар ол биыл елордада 33 білім беру нысанында жөндеу жұмысы жүргізілгенін атап өтті.