Астана – Қазақстанның алтын қазығы
Кәсіпкерліктің берері көп
Жуырда Президент Н.Назарбаев «Егемен Қазақстан» газетінде жариялаған «Астана – Қазақстанның ұлы дәуірі және стратегиялық векторы» атты мақаласында елорданың серпiндi дамуына айрықша тоқталды.
Бүгінде Астананың келбетіне сүйсінбейтін жан жоқ. Күн санап биіктей түскен еңсесінен тәуелсіздігіміздің тегеурінін, еліміздің ерен қасиетін, жаңашылдық пен жасампаздықтың жаңғырығын айқын байқаймыз. Ал, әрбір азамат өз елордасын және оның қазіргі заманға сай жетістіктерін мақтан тұтады, жүрегіне қуаныш ұялатып, ертеңге деген сенімін шындай түседі. Елбасы айтқандай, Қазақстанның жас елордасы – қазақтың мерейі, мәртебесі, ұлт келбеті, қарыштап дамудың, жетістіктің, мақтаныштың, мәңгілік достықтың символы бола білді. Президент өз сөзінде «…Еңбек етуші халықтың 60%-ы шағын және орта бизнесте жұмыс істеген кезде Қазақстан тұрақтылыққа қол жеткізетін болады…» деген болатын, ал мақаласында астаналықтардың 60 пайыздан астамы шағын және орта бизнес саласында екендігін жазады. Бұл – өте қуантарлық нәтиже, себебі, еліміз үшін шағын бизнесті дамыту – ең басты міндеттердің бірі, әрі жас мемлекет болғандықтан, шағын және орта бизнесті дамытуға зор мүмкіндіктердің бар екендігін көрсетеді.
Сондай-ақ, «Қазақстан-2050» стратегиясында кәсіпкерлікті – ұлттық экономиканың жетекші күшін жан-жақты қолдау, әлемнің дамыған 30 мемлекетінің қатарына кіру керектігі аталып өткен болатын. Демек, бәсекеге қабілетті Қазақстанды құру үшін қоғамның белсенді мүшесі болып жастарды кәсіпкерлікке барынша тарту маңызды екендігі анық. Ал, мемлекет экономиканы тұрақтандырудың негізгі бағыты ретінде кәсіпкерлікті дамытуға барынша қолдау көрсетіп отырғаны белгілі. Осы мүмкіндіктерді пайдаланып, маңызды міндетті орындауда жас кәсіпкерлердің алатын өзіндік орны бар деп санаймын. Жастар – болашағымыз және әрқашан мемлекеттің ерекше назарында болып келді. Сондықтан, асқақ арманына қол жеткізудің жолдарын көбі осы қаламен байланыстырғысы келеді. Ал, Елбасының арманынан бой көтеріп, сайын Сарыарқаның төсінде тотыдайын таранған Астанамыз бай дәстүрімен, бірегей сәулетті құрылыстарымен, мәдени ескерткіштерімен Еуразияның шоқтығы биік қалаларының біріне айналатынына сенімдімін.
Мақсат ҚОЖАМБЕК,
Қазақстанның жас кәсіпкерлері
қауымдастығының төрағасы
ЕЛОРДАНЫҢ ҰЛЫ ДӘУІРІ БАСТАЛДЫ
Ел мен жер тағдырының елеңдетпейтін кезі жоқ. Арғы, бергі аталарымыздың ту көтеріп, туырлық тігер, құттыхана шаңырағының уығын шаншар майлы да жайлы, қой үстіне бозторғай жұмыртқалардай жұмақ мекен таңдауы тегіннен тегін болмаған. Аңыз бен ақиқаттың шырайындай Асан бабамыздың желмаямен жаһанды кезіп, халқына құт мекен болатын жерұйықты іздеуінде жан тебірентерліктей сыр жатыр емес пе? Ұлытаудан басталар ұлы көшіміздің кеңес дәуірі кезінде Астана қазығын бірде Орынбор, бірде Қызылордаға қадап, одан Алматыға тұрақтауы Мәскеудің пәрменімен болған еді.
Ел егемендігін алғаннан кейін Нұрсұлтан Назарбаевтың елорданы Алматыдан Астанаға көшіру туралы шешім қабылдауы тәуелсіз мемлекеттің алғашқы стратегиялық батыл бағыттарының бірі болатын.
Астана – Президенттің Жарлығымен 1997 жылғы 10 желтоқсанда «Қазақстан Республикасының елордасы» деген ресми атау алды. Тура бір жылдан соң 1998 жылы 10 шілдеде Қазақстанның жаңа елордасы – Астананың тұсауы кесілді. Бір жыл өткеннен кейін Астанаға ЮНЕСКО-ның «Бейбітшілік қаласы» деген наградасы берілді. Халықаралық баға Астананың әлеуметтік-экономикалық, саяси және мәдени дамуына игі әсер етті. Бразилияда өткен байқауда Астана барлық өлшемдер бойынша әлемнің әртүрлі елдерінің он екі қаласынан озық тұрды.
«ЭКСПО-2017» халықаралық көрмесін Астанада өткізу туралы қабылданған шешім де аса ірі уақиғаға айналды. Біз әлі осы жеңісіміздің аса зор маңызын сезініп болған жоқпыз. Бұл көрме өтетін елді, шын мәнінде, бүкіл әлем таңдады. Қазақстан айқын басымдықпен жеңіске жетті. Бұл – бүкіл жер-жаһанның бізді түстеп танып, үстеп сенім артуы.
Бұл Қазақстан елордасының ұлы дәуірі басталғанын білдіреді.
Бибігүл БӨЛЕГЕНОВА,
саяси ғылымдар
кандидаты
Көңілімізді көкке өрлетті
Елордамыздың 15 жылдық мерейтойына орай Елбасымыз жариялаған мақала бәріміздің болашаққа деген үмітімізді еселей түскендей болды. «Астана – Қазақстанның ұлы дәуірі және стратегиялық векторы» деген тақырыбының өзі қаладағы мекемелердің қаншалықты үлкен жауапкершілікке ие екенін аңғартатын тәрізді. Әсіресе, қала тарихына қатысты деректер өте маңызды.
«Астананы құру тарихының да қырлары көп, айтары мол. Келешекте біздің барлық мектептерімізде Қазақстан тарихы бойынша «Астана тарихы» атты жеке арнаулы курс өткізілетініне сенімдімін» дейді Президентіміз. 1995 жылғы қарашаның 23-інде ашылған Астана қаласының мемлекеттік мұрағатының мойнындағы міндет те, міне, осы.
Біздің мекемеде алғашқы күннен бастап осы қала тарихына қатысты құжаттар мен деректемелер молынан жинақталды. Бүгінде мұрағат қоры 313 мыңнан астам деректі құжатты сақтап отыр. Оларды жинақтау барысында мекеме қызметкерлері аянбай еңбек етіп келеді. Бұл бағытта шет елдердің мұрағаттарына да іссапарлар ұйымдастырылып, талай құнды деректер мен жәдігерлер қолға түсірілді. Атап айтқанда, Омбы тарихи мұрағатына, Орынбор облысының мемлекеттік мұрағатына, сол секілді Татарстанның ұлттық мұрағатына барған сапар барысында көптеген құнды мәліметтер табылды. Жалпы, біздің қаланың түпкі тарихына қатысты негізгі деректердің шекара сыртында екендігі белгілі. Өйткені, қаламыздың іргетасы қаланған уақытта біздің елді бағындырған орталық сол жақтарда болған. Сол себепті, әсіресе, өткен ғасырдағы төңкеріске дейінгі кезеңдердің тарихына қатысты материалдар аталған қалаларда молынан сақталып келген. Мәселен, қалада полиция, пошта қызметі қалай қалыптасқаны, қалай тың игеру жұмыстары жүргізілгені, әскери дивизиялардың қалай құрылғаны, олардың қалай қызмет істегені – бәрі-бәрі сол құжаттарда кеңінен жазылған.
Ал тәуелсіздіктен кейінгі кезеңнен ең маңызды құжаттар қорын ел астанасын Алматыдан Ақмолаға көшіру барысындағы мәліметтер қамтиды.
Жалпы, біздің мұрағат уақыт өткен сайын байи түсуде. Оларды насихаттап, көпшілікке жария ету мақсатында да түрлі шаралар ұйымдастырылып жүр. Жекелеп тоқталатын болсақ, біздің мекемеде көрме залы бар. Онда әр атаулы уақиғалар мен белгілі бір даталарға байланысты көрме ұйымдастырылып тұрады. Одан бөлек ақпарат құралдарымен тығыз байланыс орната отырып, бұқара халыққа Астана тарихын жариялау мақсатындағы түрлі материалдарды таратып отырамыз. Сол секілді, ғалымдарды, қоғам қайраткерлерін шақырып, түрлі басқосулар өткіземіз. Мәселен, биылғы қала күні қарсаңында халықаралық деңгейдегі ғылыми-тәжірибелік үлкен конференция ұйымдастырылды.
Ең маңыздысы, бізде қазіргі кезде арнайы оқу залы бар. Мекемеге келіп, Астана тарихымен танысуға талпынған азаматтарға мұрағат құжаттары танысуға беріледі. Ашық тақырыптар бойынша қаламыздың тұрғындары ғана емес, шетел азаматтары да келіп, ақпарат ала алады.
Мұның бәрі, Президентіміз Нұрсұлтан Назарбаев айтып өткендей, қыр-сыры мол Астана тарихын айшықтау мақсатында жүзеге асырылары даусыз. Ал Елбасы «Астана – Қазақстанның ұлы дәуірі және стратегиялық векторы» атты мақаласында атап өткен Астана тарихы туралы пәннің мазмұнын қалыптастыруға біздің мекеме әрдайым мұрындық боларына сенім мол.
Балқия БАЙМАҒАНБЕТОВА,
Астана қаласы мемлекеттік мұрағатының директоры