АСТАНА – СПОРТ АРЕНАСЫ
Астана бүгінде республикалық қана емес, әлемдік дәрежедегі спорт жарыстарын өткізетін халықаралық аренаға айналып отыр. Бас қаламыздың мұндай деңгейге көтерілуіне тек жаңадан салынған зәулім ғимараттар ғана қызмет етіп қоймай, өз ісіне адалдықпен қарайтын білікті мамандардың да қосып отырған үлесі зор деп білеміз.
Күні кеше аталып өтілген Тәуелсіздік мерекесіне орай Қазақстан Республикасы Президенті Жарлығымен мемлекеттік награда алғандардың қатарында астаналық спортшылардың болғанын қуанышпен жеткізгіміз келеді. Атап айтқанда, бүгінде Астана қаласы бойынша көркем гимнастикадан аға жаттықтырушы, №1 БЖСМ-де оқытушы-жаттықтырушы болып еңбек етіп жүрген Ләйлім Омарова мереке қарсаңында «Құрмет» орденін алды. Ұзақ жылғы еңбек жолында көптеген республика чемпиондарын, халықаралық жарыстардың жүлдегерлерін дайындаған Ләйлім Хакімқызы – КСРО спорт шебері, жоғары дәрежелі жаттықтырушы, ұлттық жоғары дәрежедегі төреші деген құрметті атақтардың иегері.
Көптеген жылдар Астана намысын абыроймен қорғап жүрген атлетіміз Серік Абдахин де «Құрмет» орденімен марапатталды. Гир көтеруден еліміздің 13 дүркін чемпионы болған, ардагерлер арасында әлем чемпионы атанған жерлесіміз ұзақ жылдар қаламыздағы студенттер спортын дамытуға ерекше үлес қосқан маман ретінде белгілі. Халықаралық дәрежедегі спорт шебері бүгінгі таңда Астана қаласындағы «Толағай» жоғары спорт шеберлігі мектебінде оқытушы әрі жаттықтырушы болып жемісті еңбек етіп келеді.
Мемлекет басшысы атынан сыйлық алғандардың қатарында Астана қаласы бойынша қазақ күресінен аға жаттықтырушы әрі «Астана батыры» жекпе-жек клубының қызметкері Ерлан Естек те болды. Әр жылдарда әлем чемпионы, әлем кубогының жеңімпазы, «Еуразия барысы» турнирінің жеңімпазы, еліміздің бірнеше дүркін чемпионы болған саңлақ балуанымызға «Қазақстан Республикасының Құрмет грамотасы» табыс етілді.
Мерейі өскен елордалық бапкерлерді Астана қаласы Туризм, дене тәрбиесі және спорт басқармасының басшысы Айталап Кургамбаев ұжым алдында тағы бір құттықтап, еңбектерінің жемісті бола беруіне тілектестік білдірді.
Ғалым ҚОЖАБЕКОВ