Астанада көлік тұрағы көбейеді
«ЭКСПО – 2017» халықаралық көрмесіне байланысты француздар Есілдің сол жағалауына 3 көпдеңгейлі автотұрақ салмақшы. Осыған байланысты жексенбі күні Астана қаласы әкімінің орынбасары Қанат Сұлтанбеков пен VINCI компаниясының Орталық Азия бойынша коммерциялық директоры Франсуа Шевалье өзара ынтымақтастық туралы Меморандумға қол қойды.
Қала әкімінің орынбасары өз сөзінде Астанада көліктің көптігіне байланысты тек күндіздің өзінде 13 мыңға жуық көлік қоятын орын жетіспейтінін айта келіп, 2017 жылға дейін 7 автотұрақ салу жоспарланып отырғанын жеткізді.
Есілдің сол жағалауында бой көтеретін бұл көлік орындарының 3-еуін осы француз компаниясы мойнына алып, биыл құрылысын бастауға әзір. Мемлекеттік-жекеменшік әріптестік негізінде жүзеге асырылатын жобалар 30 жылдан кейін муниципалдық меншікке өтетін болады.
– «ЭКСПО-2017» халықаралық көрмесінің өткізілуіне байланысты елордада талқыланып жатқан жобалар көп. Солардың бірсыпырасы биылға жоспарланған. Өздеріңіз қолға алуға ықылас білдіріп отырған паркингтер жобасы да соның ішінде. Бұдан бөлек, осы жылдың соңына дейін тағы 4 автотұрақтың құжаттамаларын әзірлеп, бұл жобаларды да мемлекеттік-жекеменшік әріптестік негізінде жүзеге асырмақшымыз, – деді Қанат Таңатарұлы.
Қос тараптың жүздесуінде сөз алған VINCI Construction Grands Projets компаниясының Орталық Азия бойынша коммерциялық директоры Франсуа Шевалье бұл келісім Астана әкімдігімен жасасқан алғашқы пилоттық жоба болып отырғанын, бұдан кейін де Қазақ елінің жас елордасының дамып-өркендеуіне өз үлестерін қосуға әрдайым дайын екендігін атап өтті.
Өздері туралы әңгімелеген Шевалье мырза компанияның көп деңгейлі көлік тұрақтарын салудағы тәжірибесі мол екендігін, құрылыс жұмыстарында қазіргі заман талабына сай келетін сапалы материалдар ғана пайдаланатынын айтып өтті.
Олар Астанаға бағаналары жоқ, көлік кедергісіз, еркін кіріп-шығатын ірі автотұрақтар салып бермекші. Бұған қоса, елордаға ұсынатын жеңілдіктері де бар көрінеді.
Өзара келісімдер туралы құжатқа қол қойған қос тарап әріптестікті одан әрі нығайта түсетініне сенім білдірді.
Қымбат НҰРҒАЛИ