АСТАНАДА ӨНДІРІС ӨРІСТЕЙДІ
Астана қалалық мәслихатының депутаттары «Астана – жаңа қала» арнайы экономикалық аймағында орналасқан өндіріс орындарын аралады.
Бүгінде Астана елдің барлық аймағы бой түзейтін қалаға айналды. Жаңа өнеркәсіпті дамыту да елордадан бастау алған. Біз оны қалалық мәслихаттың депутаттарымен индустриалды-инновациялық аумақты аралағанда анық байқадық. Аталған аймақ 2001 жылы құрылған. Оның аумағы 7 634, 71 гектарға созылып жатыр.
Депутаттар алдымен аттың басын еліміздегі жеңіл өнеркәсіп үздіктерінің бірі «ПИК Астана Ютария ltd» ЖШС-не тіреді. Кәсіпорын әлемдік бренд саналатын «ZOJE» тігін машиналарымен жабдықталған. Шығаратын өнімінің сапасы еуропалық немесе түрік текстилінен ешбір кем емес. Әскери киімдерге де арнайы тапсырыс алған. Сондай-ақ, мұнда қонақ үй, мейрамхана, медицина салаларына арналған бұйымдар мен үйге лайықты текстиль өнімдері де даярланады. «Бизнестің жол картасы – 2020» бағдарламасы аясында жүзеге асқан кәсіпорын қаншама адамға жұмыс ұсынып отыр.
Мемлекетіміздің үдемелі индустриалды-инновациялық даму бағдарламасы аясында жүзеге асқан жобалардың бірі – «Тұлпар-Тальго» вагондары екені белгілі. Қазіргі күнде аталған вагондардан құралған жүрдек жолаушылар пойызы еліміздің барлық аймақтарына қатынайды. Бүгінде испаниялық компаниямен бірлесіп салынған зауытта отандық өнім 20 пайыздан асқан. Жыл сайын бұл көрсеткіш жоғарылай бермек. Негізінен, жобаның қуаттылығы бойынша жылына 150 жолаушылар вагоны шығарылады. Бүгінге дейін 400-тен астам жолаушылар вагоны пайдалануға берілген.
Депутаттар «Тұлпар-Тальго» зауытында болған кезде ондағы мамандардың жұмысын жіті бақылады.
«Жалпы, жолаушылар тасымалына арналған вагондардың артықшылығы көп. Пойыз сағатына 200 шақырым жылдамдықпен жүйткиді. Пневматикалық жабдықталу, есіктердің автоматты ашылып-жабылуы, жылдамдықтан белгі беретін ABS жүйесі де жолаушылардың жайлылығы үшін қолайлы» дейді зауыт директорының өндіріс жөніндегі орынбасары Владимир Киселев.
Қазіргі таңда «Тұлпар-Тальго» пойыздарының қызметін миллионнан астам жолаушы пайдалануда.
«Электровоз құрастыру зауыты» – еліміздегі ең ірі жобалардың бірі. Ол Қазақстан, Франция және Ресейдің бірлескен кәсіпорны саналады. Өндірістік алаңның аумағы 27 мың шаршы метрден асады. Жылына 50 электровоз құрастыру жоспарланған. Бүгінде кәсіпорын толықтай өз қуатында жұмыс істейді. Мамандар шетелге барып, арнайы курстан өткен. Бүгінде отандық КZ8А электровоздарын шет мемлекеттер де сатып алуға қызығушылық танытып отырған көрінеді.
Сонымен бірге депутаттар «Қазақстан Аселсан инжиниринг» ЖШС-нің қызметімен танысты. Қазақ-түрік бірлескен кәсіпорны негізінен еліміздің қорғаныс-өнеркәсіп кешені өнімдері саналатын электрондық-оптикалық құрылғылар, электрондық платалар мен линза өндірісі үшін технологиялық құжаттар, материалдар мен жабдықтар шығарады. Кәсіпорын толықтай уақыт талабына сай жоғары технологиялық құралдармен жарақталған.
Бір байқағанымыз, индустриалдық аймақта орналасқан өндіріс орындарында еңбек етіп жүргендердің дені – жастар.
Түйіндеп айтқанда, мәслихат депутаттары әр кәсіпорынның жұмысымен жақын танысып, өздерін толғандырған сұрақтарын қойып, мамандардан нақты жауаптар алды.
Азамат ЕСЕНЖОЛ