Астанада полицейлер қатары 100-ден аса жас қызметкермен толықты
Тәртіп сақшыларының жұмысына жаңадан қосылғандардың ішінде учаскелік полиция инспекторлары, жедел уәкілдер, криминалистер, анықтаушылар бар.
«Бұл – өмірлеріңіздегі ең бір есте қаларлық күн. Бүгіннен бастап ішкі істер органдарының толық құқылы қызметкерісіздер. Өз таңдауларыңызды мақтан тұтыңыздар! Қазақстан Республикасының Конституциясын қатаң сақтап, кез келген жағдайда мемлекет заңнамаларын бұзбайтын елге адал азамат болыңыздар!» деді Астана қаласы Ішкі істер департаментінің бастығы, полиция генерал-майоры Амантай Әубәкіров.
Жас мамандарды қызметке қабылдау салтанатында сыбайлас жемқорлық көріністерін алдын алу, адамгершілікке тәрбиелеу мақсатында тақырыптық фильмдер көрсетілді. Сондай-ақ, жаңа қызметкерлер Астана қаласы ІІД ардагерлер кеңесі төрағасының орынбасары отставкадағы милиция полковнигі Александр Князевтің әңгімесінен көптеген қызықты жайттарды естіп, қазіргі және өткен кезеңдердегі қызмет атқарудың айтарлықтай ерекшеліктері туралы ой бөлісті.
Мәдина ЖАҚЫП