Ел тынысы

Астанада қай салаларға инвестиция тартылады?

Өңірлік инвестициялық штаб отырысында Астана әкімі Жеңіс Қасымбектің басшылығымен инвестициялық жобалар талқыланды, деп хабарлайды astana-akshamy.kz

Отырысқа ірі шетелдік инвесторлар да қатысты. Олар – «YDAholding» түркиялық компаниясы, «GE HealthCare» америкалық компаниясы, сондай-ақ отандық инвесторлар: «ТОКК «Қазақстан» ЖШС, «Land Invest Group» ЖШС және т.б. Қатысушылар отандық және шетелдік инвесторлардың араласуымен жүзеге асырылып жатқан жобалардың қазіргі мәселелерін, оның ішінде олардың тиімді болуына қатысты мәселелерді қарастырды.

Мысалы, «YDA» түрік компаниясы өңдеуші өнеркәсіпте жалпы инвестиция сомасы 32,6 млрд теңгеге 2 жобаны және жалпы сомасы 165 млрд теңгеге жуық денсаулық сақтау саласындағы 2 жобаны іске асырып жатыр.

«Астана-Технополис» АЭА аумағында америкалық «GE HealthCare» компаниясы медициналық жабдықтарды өндіру жөніндегі инвестициялық жобаны іске асыру үшін жер учаскесі белгіленді. 27 млрд теңгеге жуық сомаға жобаны іске асыру 6 мың жаңа жұмыс орнын құруға мүмкіндік береді.

Отандық инвестор «ТОКК «Қазақстан» ЖШС елордада өзінің екінші ірі инвестициялық жобасын іске асыруға кірісті. Ол жалпы инвестиция сомасы 55 млрд теңгеге тамақ өнімдері мен металл қақпақтарға арналған консерві (алюминий) банкаларын өндіруді көздейді. Зауыттың өндірістік қуаты жылына 1 млрд дана өнімді құрайды.

Сонымен қатар, отандық инвесторлар елорданың Алматы, Нұра және Есіл аудандарында көлемі 3500 шаршы метр болатын 3 мектеп салуды жоспарлап отыр.

Сондай-ақ, отырыста елордадағы апатты үйлерді жаңарту бағдарламасы аясында «Land Invest Group» ЖШС-ның ескі тұрғын үйлерді жаңарту орындарында коммерциялық инфрақұрылым құру туралы ұсынысы қаралды. Бұл ұсыныстың оң әсері қалаға жеке инвестицияларды тарту, тұрғын үй қорын жаңарту, елорданың сыртқы келбетін жақсарту болып саналады.

Сонымен қатар, №1 Индустриалды парк ауданында «Темірсервис Астана» ЖШС, «Central IndustrialPark» ЖШС қатысуымен теміржол жүк ауласын, өнеркәсіптік-өндірістік қойма кешенін қамтитын логистикалық хаб салу бойынша 2 жобаны іске асыру жоспарланып отыр.

Өңірлік инвестициялық штаб отырыстары ай сайын өтеді, онда әрбір жоба мүдделі мемлекеттік органдар мен коммуналдық қызметтердің қатысуымен жеке қаралады.

Тағыда

admin

«Астана ақшамы» газеті

Ұқсас жаңалықтар

Back to top button