Ақпарат көзі жасырын түрде жұмыс істейтін сиқыршылар мекфласқанын жазбаған. Тек Валерий деген сиқыршының оқушыларды сиқырдың қыр-сырына баулитынын айтқан. Бұл мектепте жеткіншектер экстрасенстық әлемге де терең бойлаумен қатар, шөппен емдеуді де үйренетін көрінеді.
Әрине, елордалық оқушылар сиқыршылық өнерді меңгеріп, Балтабек, Раиса Жұмағұловтар, Алтынай Байтоқановалар секілді әлемге танылып жатса, несі айып? Бірақ елді алаңдатқаны бұл емес, сиқыршылар мектебінің жасырын жұмыс істеуі еді. Егер ісінде қандай да бір кілтипан болмаса, ол неге жұмысын құпия жүргізеді? Осыдан бірнеше жыл бұрын Литвада осындай сиқыршылар мектебі ашылғанда, жергілікті діни басқарма оны құптамайтынын аңғартқан. Бірақ бұл мектеп өзінің жұмысын ашық түрде жүргізіп, оқығысы келген оқушыларды тек ата-анасының рұқсатымен қабылдаған. Соның өзінде билік өкілдері алаңдаушылық танытқан. Ал елордадағы мектептің бары рас болса, оның қандай бағыт-бағдар ұстанатыны, мақсат-мүддесі не екендігі беймәлім. Әрі мұнда ежелгі мысырлық және римдік мистериялар туралы да айтылатын көрінеді. Бұл – тікелей дінмен байланысты ілім.
Астанадағы жасырын сиқыршылар мектебі төңірегіндегі әңгіме елордалық Білім басқармасы мамандарының да құлағына жетіпті. Осы мекеменің әдіскері Зәмзәгүл Кенжеахметованың айтуынша, елордада мұндай мектептің болуы мүмкін емес, бұл – шындыққа жанаспайтын қауесет сөз. Ақпарат таралысымен Білім басқармасы күллі мектептерге шығып, басшылар мен олардың тәрбие ісі жөніндегі орынбасарларына, сынып жеткшілерінің әдістемелік бірлестігіне, мектеп инспекторлары мен психологтарға оқушылармен сөйлесіп, олардың жүріс-тұрысын бақылауға алуға, ата-аналармен тығыз жұмыс істеуге тапсырма берген.
– Бізде аптасына екі рет тәрбие жұмыстары жөнінде арнайы жиын өтеді. Атқарылған жұмыстардың нәтижесін осы басқосуда талқылаймыз.
Жасырын жұмыс істейтін сиқыршылар мектебі мәселесі де кеңінен сөз болып, бақылауды күшейттік. Бірақ ешқандай айғақтар табылған жоқ. Оқушыларымыздың бойынан да оғаш қылық пен күдік туғызатын жағдайларды көрген жоқпыз. Сондықтан бұл әңгіме шындыққа еш жанаспайды, – дейді Зәмзәгүл Сейітқызы бізге берген түсініктемесінде.
Дегенмен де «Сақтықта қорлық жоқ». Қазіргі таңда ағылшын жазушысы Джоан Роулингтің ойдан құрастырған кейіпкері Гарри Поттерге еліктегісі келетін жеткіншектер баршылық. Балаларымыз зұлым күшті сиқырлық қасиетімен жеңген британдық балаға ұқсаймын деп адасып, жасырын үйымдарға мүше болмасына кім кепіл? Сондықтан ата-аналар балаларының бос уақытын қалай, кіммен өткізетінін біліп-сұрап, жүріс-тұрысын бақылап отырғаны артық болмас.
Қымбат ТОҚТАМҰРАТ
