Еркеғали Рахмадиев атындағы Мемлекеттік академиялық филармония өткен 2024 жылды табысты аяқтады. Құрамындағы 13 шығармашылық ұжым еліміздің музыкалық өнерін тек Қазақстанда ғана емес, шетелдерде де кеңінен танытты.
Халықаралық гастрольдер:
Камералық хор Үндістанның бірнеше қаласында өнер көрсетіп, Lakshminarayana Global Music Festival фестивалінде қазақстандық өнерді паш етті;
«Шалқыма» халық би ансамблі Катарда қазақ биін танытты;
Қазақ оркестрі Түркияда, Қытайда, Өзбекстанда, сондай-ақ Тәжікстан мен Ресейде өткізілген түрлі халықаралық іс-шараларда жоғары кәсіби деңгейін көрсетті;
Ғ.Жұбанова атындағы ішекті квартет Ресей мен Грузияда классикалық музыка кештерін өткізді;
«Сарыарқа» мен «Шалқыма» ансамбльдері Португалияда FOLK Cantanhede фестивалінде ұлттық өнерімізді ұлықтады.
Мәскеудегі Астананың мәдени күндері аясында Ресей Федерациясының астанасында филармония әртістерінің салтанатты гала-концерті, Марокко елінде Республика күніне, ал Эстония мен Финляндияда Тәуелсіздік күніне орай ұлттық бағдарлама ұсынды.
Республикалық гастрольдер:
Филармония ұжымдары Қазақстанның көптеген қалаларында өнер көрсетіп, көрермендерге ерекше мәдени бағдарламалар ұсынды. Атап айтқанда, «Шалқыма» ансамблі Павлодарда, Симфониялық оркестр Көкшетау мен Петропавлда, «Қорқыт» ансамблі Тараз бен Қарағандыда өнер көрсетті.
Елеулі оқиғалар:
2024 жылы филармония өткізген 400-ден астам іс-шараға жарты миллионға жуық көрермен қатысты.
Симфониялық оркестр 25 жылдығын атап өтіп, әлемдік деңгейдегі музыканттарды шақырды;
Қазақ оркестрі мен шығармашылық ұжымдар «Бейбарыс» операсының премьерасын ұсынды;
Filarmonia Fest фестивалі аясында Есіл жағалауында ауқымды музыкалық шеру өткізілді;
Нұржамал Үсенбаеваның І Халықаралық вокалдық өнер байқауы үлкен табыспен өтті.
