Астаналық өнертапқыш Евгений Щербатовтың «Мангуст» трекеріне АҚШ-тан көлемді тапсырыс түсті
Былтыр елордалық өнертапқыш Евгений Щербатов «Мангуст» атты трекер ойлап тапқан-ды. Жаңа құрылғы балалардың қауіпсіздігін бақылауға арналған. Жақында инженер өз өнертабысына АҚШ-тан көлемді тапсырыс алды. Бұл жаңалықты Технологиялық даму жөніндегі Ұлттық агенттік хабарлады.
Аталмыш мекеменің деректеріне сүйенсек, Евгений Щербатовтың «Мангуст» трекері «Technation» байқауында топ жарған соң, тек қазақстандықтардың ғана емес, шетелдіктердің де тарапынан үлкен қызығушылыққа ие бола бастаған.
«Бүгінде Сан-Францискодағы Аутист балалар ұйымынан көп тапсырыс алынды. Сондай-ақ, Қазақстанда «Қазпошта» акционерлік қоғамы сәлемдемелерді қадағалау үшін осы құрылғыға тапсырыс берді. Отандық GPS-қауіпсіздік жүйесі – халықаралық нарықтағы бірегей өнім», – дейді ведомство өкілдері.
Айрықша жобаның құны 18,8 миллион теңге екен. Оның 90 пайызын, яғни, 17,7 миллион теңгесін Технологиялық даму жөніндегі ұлттық агенттік қаржыландырған.
Бір істің туындауына бір іс түрткі болмай ма?! Жоғарыдағы аппаратты жасау идеясы да жоба авторы Евгений Щербатовқа баласынан көз жазып қалған соң келіпті. Пайдалы әрі тиімді құрылғы болғандықтан, бұқаралық сатылымға шығып үлгермесе де, оған 670-тей адам қызығып, тапсырыс беріпті.
«Мангуст» трекері адамның қайда жүргенінен 24 сағат бойы хабардар болып отыруға мүмкіндік береді. Ол үшін құрылғыны әлгі адамға беріп, өзіңіз арнайы мобильді қосымша арқылы қадағаласаңыз жеткілікті. Бұл өнім, әсіресе, кішкентай балалар үшін таптырмас құрал екені даусыз. Трекер мықты, су астында да жұмыс істейді, қолға ұстауға қолайлы және қауіпсіз.
Сонымен қатар, қуат үнемдегіш қасиетінің арқасында құрылғыны 20 күнде бір рет қуаттауға болады. Аппарат әлемнің ұялы байланыс бар кез келген нүктесінен сигнал жеткізеді. Бұдан бөлек, координаттарды анықтау дәлдігімен де ерекшеленеді. Сонымен қоса, қолдануы қарапайым болғандықтан, мүмкіндігі шектеулі адамдарға да ыңғайлы.
Балама жүйелердің кемшіліктері – не оларда «Мангусттағыдай» қуат үнемдегіш қасиет жоқ, не сәл соққыдан бұзылып қалуы мүмкін. Ал мықтылық бұл аппарат үшін өте қажет. Балалар жүгіреді, секіреді, құлап қалады. Сол кезде құрылғы да еш зақымданбауы тиіс.
Ботагөз МАРАТҚЫЗЫ