Өткен жылы Әлеуметтік медициналық сақтандыру қорына елордалықтардан 4348 шағым түскен.
«ӘМСҚ» КеАҚ астана филиалының директоры Нұрлыбек Қабдықапаров елордалықтардың қандай медициналық қызметтердің қолжетімсіздігіне байланысты көп шағымданатынын айтты.
– Атап айтқанда, салалық бейінді мамандар, диагностикалық қызметтер, учаскелік қызметті, жалпы тәжірибелік дәрігер, терапевт-дәрігер, педиатр қабылдауын, жедел жәрдем бригадасын ұзақ күту (31,8%) мәселесі өткір. Екінші орында – медициналық көмек сапасының төмендігі (30,4%). Сондай-ақ медициналық көмек көрсетуден бас тарту (5,3%), медициналық көмекті ұйымдастыру (4,9%), дәрі-дәрмекпен қамтамасыз етуден бас тарту (4,3%), медициналық әдеп/этика мен деонтологияның бұзылуы (4,3%), көрсетілмеген қызметтер бойынша жалған жазбалар – медициналық ұйымның ақпараттық жүйелеріндегі сенімсіз ақпараттың болуы да (3%) өзекті, – дейді филиал директоры. Осы шағымдар негізінде былтыр 200-ден аса жоспардан тыс мониторинг жүргізілген. Соның нәтижесінде 155 кемшілік анықталған.
