АСТАНАЛЫҚТАРДЫҢ СПОРТҚА ЫНТАСЫ ЗОР
Бас қаламыздың спортшылары спорттың көптеген түрлері бойынша ұлттық құрамаға енген. Әрі олар байрақты бәсекелерде топ жарып жүр. Елорда спортының жетістіктері туралы Астана қаласы Туризм, дене тәрбиесі және спорт басқармасының басшысы Айталап Кургамбаев әңгімелейді. |
– Астанада қанша адам бұқаралық спортпен айналысады?
– Астана қаласының әрбір төртінші тұрғыны дене шынықтыру және спортпен айналысады. Ал олардың көпшілігі, яғни, 35 пайызы жүзуге баратыны, әрбір бесіншісі бокс, күрес секілді жекпе-жек түрлерін таңдайтыны, әрбір үшіншісі футболды қалайтыны белгілі болып отыр. Одан әрі зерттеуші әлеуметтанушылар фитнес, жеңіл атлетика және велоспортқа әуестенушілер санының артып отырғанын айтады.
Астана қаласында соңғы бес жылда денешынықтыру және спортпен тұрақты айналысатындар қатары екі есе өсіп, бүгінде олардың саны 168230 адамға жетті.
– Аула спорт алаңы қанша және қалай жабдықталған?
– Аула спорт алаңдары бойынша жұмыс Астана қаласының Жастар саясаты мәселелері басқармасы мен Астана қаласының Білім басқармасына жүктелген болатын. Алайда, біздің басқармамыз да осы жұмысқа белсене араласып, өз тарапынан балаларды спортқа баулып, көмек көрсетіп келеді. Көбіне аула спорт алаңдарында біздің жаттықтырушылар жұмыс істейді.
– Балалар-жасөспірімдер спорт мектептерінің жай-күйі қалай ?
– Қалада он балалар мен жасөспірімдер спорт мектебі жұмыс істейді. Алты олимпиадалық резерв мектебі бар. Оларда
6787 адам спорттан шеберлігін шыңдауда. Бұл өткен жылмен салыстырғанда әлдеқайда жоғары. Биыл алғашқы даярлау спорт топтарына 1823 бала қабылданды. Балалар мен жасөспірімдерді 392 білікті маман жаттықтырып жүр. Спорт мектептерінде болашақ чемпиондар 53 спорт түрімен, соның ішінде 36 олимпиадалық бағдарламаға енген спорт түрлері бойынша дайындалады. Астана қаласының құрама командасы бүгінде республикалық кешенді жарыстардың көшбасшысы болып, нағыз чемпиондар «ұстаханасына» айналып отыр. Биыл көктемде өткен Қазақстан Жастар ойындарында астаналық жас спортшылар жалпыкомандалық жарыста екінші орынды иеленді. Осы жарыстарда Астана командасы ғана барлық 35 спорт түрі бойынша спортшылар шығарды. Нәтижесінде, 103 алтын, 65 күміс және 112 қола медаль жеңіп алды.