Кеше Қазақстан Футбол федерациясының президенті Әділбек Жақсыбеков «Астана» ФК футболшылары мен жаттықтырушылар штабына алтын медаль табыс етті.
«Астана» командасы осы күнге дейін өзінің аз ғана тарихында екі мәрте Қазақстан кубогына, Суперкубок пен күміс жүлдеге қол жеткізген болатын. Бірақ, бүкіл атақтың ішінде чемпион ғана жоқ еді.
2014 жылы жас клуб бұл шыңды да бағындырды. Станимир Стойловтың тәрбиеленушілері жеңіске деген ынтасы мен шеберліктерін көрсетті. Олар басты қарсыласы – «Қайрат» командасын чемпионаттың аяқталуына бір тур қалғанда жеңді.
Өткен жылы елордалық команда Мемлекет басшысы Н.Ә.Назарбаевтың бастамасымен құрылған «Астана» президенттік кәсіптік спорт клубының бір бөлігіне айналды. Сонымен қатар, биыл «Астана» УЕФА Еуропа лигасында да лайықты өнер көрсетті. Арменияның «Пюник», швециялық АИК және Испанияның «Вильярреал» командаларымен керемет ойын көрсетіп, жанкүйерлерін қуантты.
СҮБЕЛІ СӨЗ
Әділбек Жақсыбеков, ҚФФ президенті:
– Қазақстан футбол федерациясының және футбол қоғамының атынан «Астана» футбол клубын футболдан Қазақстан Республикасы чемпионатының 2014 жылғы маусымында мерзімінен бұрын жеңіске жетуімен құттықтаймын!
Бұл – табанды күрес нәтижесінде қол жеткізген жетістік. Турнир барысында «Астана» өзінің шеберлігін, психологиялық тұрақтылығын, жеңіске деген ынтасын ғана емес, сонымен қатар, әдемі ойын да көрсете алды.
Команданың чемпиондық титулы – футбол клубы қызметінің барлық салаларындағы сауатты әрі дұрыс жүргізілген жұмыстың жемісі. Әрбір команда мүшесінің өз ісінде үздік болу ниеті мен ұмтылысы ұжымға биылғы маусымда жоғары нәтижеге қол жеткізуге мүмкіндік берді. «Астана» ФК-ның алдағы уақытта да табысты өнер көрсететініне, жанкүйерлерін жақсы ойынмен қуантып, қазақстандық футболдың игілігіне өзінің дамуын жалғастыратынына сенімдімін.
