АСТАНАНЫҢ ҮЗДІК ТАУАРЫ
Отандық өнімнің сапасын арттыруды көздейтін «Қазақстанның үздік тауары» көрме-байқауының өңірлік кезеңінде елорданың үздік тауары анықталды. Астана қаласы әкімінің орынбасары Мәлика Бектұрова жеңімпаздарды құттықтап, арнайы дипломмен марапаттады.
Елордада жыл сайын шағын және орта кәсіпорындардың саны артып келеді. Үздік тауарлар көрмесі кәсіпкерлердің белсенділігін арттырып қана қоймай, қазақстандық нарықты жоғары сапалы әрі бәсекеге қабілетті өніммен қамтамасыз етуді көздейді. Екіншіден, кәсіпорындар арасында сапа менеджментін дамытуға ықпал етеді.
Биылғы байқауда әуежайлар мен авиакомпанияларға арналған өнімдер, медициналық және электронды құралдар, зергерлік бұйымдар, жиһаз және азық-түлік өндіретін кәсіпорындар бақ сынады. Конкурс қорытындысы бойынша «Үздік өндірістік тауар», «Тұрғындарға арналған үздік тауар», «Үздік азық-түлік тауары» аталымдары бойынша жеңімпаздар белгілі болды.
Сонымен, сапасы мен сертификатталу өлшемдеріне қарай «Үздік өндірістік тауар» аталымын «Астаналық әйнекпакет шығару» компаниясы жеңіп алды. Ал байқауға алғаш рет қатысқан «Alab Industries» компаниясы екінші орынды иеленді. Аталмыш компания – әуежайларда кеңінен қолданатын ұшып-қону жолағын өңдеуге арналған өнімдерді шығаратын жалғыз кәсіпорын. 2015 жылы ашылған компания аз уақыттың ішінде жетістікке жеткен. АҚШ пен Канаданың зертханасында сыналған өнімдері үздік атанып, әлемдегі алдыңғы қатарлы 30 компанияның қатарына қосылып үлгерді. 2005 жылы іргесі қаланған «Спецэлектра» кәсіпорыны үшінші орынды қанағат тұтты.
«Халыққа арналған үздік тауар» аталымы бойынша 10-нан астам кәсіпорын сынға түскен екен. Бірінші орынға «LED Solution» компаниясы лайық деп танылды. Жылына 60 000 жарық шамын шығаратын кәсіпорын тұрғын үйлерге, кеңселерге, өндірістік нысандар мен көшелерге арналған жарықдиодты шамдардың 100-ден астам түрін өндіреді. «100 мектеп, 100 аурухана» бағдарламасы бойынша аумақтық және республикалық жобаларға жетекшілік жасайтын «БАРК Технолоджи» кәсіпорыны екінші орынды иеленді. Ал елордалық «Samhat» аяқ киім фабрикасы үшінші орынды қанағат тұтты.
«Үздік азық-түлік тауары» аталымы бойынша Қазақстан нарығында жеті жылдан бері талай жетістікке жеткен «Балнұр-НС» кәсіпорыны жеңіске жетті. Астаналықтардың сүйіктісіне айналған «Bambino» балмұздақтарын сатумен айналысатын кәсіпорын еліміздің 5 қаласында 50-ден астам балмұздақ түрін шығарады. Таза табиғи өнімнен жасайтын кәсіпорынның, әсіресе, қымыздан жасалған балмұздағына сұраныс көп. Бүгінде Ресей және Қытай нарығына қадам басқан.
Ал екінші орын «Golden Rill Trade» компаниясына бұйырды. 1998 жылы «Вода Хрустальная» сауда белгісімен құрылған мекеменің ауыз суы бүгінде әрбір астаналықтың үйінен табылады.
2007 жылдары нарыққа «Романовский продукт» белгісімен шыққан «Нұр Әділ» жеке кәсіпорыны үшінші орынға табан тіреді. 60 адамды жұмыспен қамтып отырған мекеме нан өнімдерін өндірумен айналысады.
– Үздіктер үзеңгі қағыстырған байқауда елорданың ең үздік мекемелері анықталды. Көрмеде халық қызығушылық танытқан өнімдердің бірі – өкпе терапиясына арналған «VibroLUNG» виброакустикалық құралы. Оны елордалық мамандар зерттеп шығарған. Ол физиотерапия құралдарының бірі әрі тыныс алу ағзаларын емдеуге арналған. Сонымен қатар, «Полезный продукт» мекемесі туралы айтуға болады. Аталмыш кәсіпорын Қазақстанда өсетін жеміс-жидектерді заманауи өңдеу тәсілдерімен айналысады. Мысалы, инфрақызыл кептіру тәсілімен дайындалған алма чипсін өндіреді. Нәтижесінде алманың нәрі өзінде сақталады. Отандық өнім импорттық десертті алмастыруы әбден мүмкін, – дейді Астана қаласы Кәсіпкерлер палатасының директоры Ғани Тасмағамбетов.
Сонымен, жеңімпаздар жыл соңында өтетін «Қазақстанның үздік тауары» көрме-байқауының республикалық кезеңіне жолдама алды.
Гүлмира АЙМАҒАНБЕТ