АУДАН АРДАГЕРЛЕРІ АРДАҚТАЛДЫ
Тәуелсіздік мерекесі қарсаңына Алматы ауданы әкімдігінің мәжіліс залында аудандық Ардагерлер кеңесінің құрылғанына 10 жыл толуына орай салтанатты шара өтті.
Алдымен сөз алған аудандық Ардагерлер кеңесінің төрағасы Сайлаубек Байболов жиналғандарды мерейтоймен құттықтап, ардагерлер кеңесінің тарихына тоқталды. Оның айтуынша, осы он жыл ішінде аудан зейнеткерлерінің саны үш есе өсіп, бүгінгі таңда жиырма бес мыңға жетіп отыр. Ауданның ардагерлер бірлестігі алғашында «Ақсақалдар алқасы» деп аталып, оны бүгінде дүниеден өткен, еңбек ардагері Сайдалы Сүлейменов басқарған. 2004 жылдың мамыр айында Алматы ауданының ардагерлер кеңесі құрылып, алғашқы төрағасы болып Жасқайрат Есеновтің, кейіннен Омар Жақыповтың сайланғанын айта келе, төраға сол кезде ардагерлер кеңесі жұмысының жандануына аудан әкімдігі көп қолдау көрсеткенін ерекше атап өтті.
2004 жылы аудандық кеңестің 16 бастауыш ұйымы болса, бүгінгі таңда олардың саны 105-ке жеткен. Әр бастауыш ұйымда 600-ден аса зейнеткер бар. Соңғы бес жылдың төңірегінде 60 бастауыш ұйым құрылды.
– Елордамызда зейнеткерлердің женілдікпен жол жүруіне жыл сайын бюджеттен 974 миллион теңге жұмсалады. Ағымдағы жылы екі жарым мың зейнеткер мен аз қамтылған отбасы 4,5 миллион теңге көлемінде әлеуметтік көмек алса, жер үйде тұратындарға көмір алуға 622 мың теңге бөлінді. Астана күніне орай 1300 адам сыйақыға ие болып, төмен зейнетақы алатын 720 зейнеткер мен тұрмысы нашар 55 отбасы азық-түлік жинақтарымен қамтылды, – деді С.Байболов.
Одан кейін сөз алған Республикалық ардагерлер ұйымы орталық кеңесінің төрағасы Өмірзақ Озғанбаев Мәскеуде өткен ардагерлер ұйымдарының кездесуінде қазақстандық ардагерлер кеңесінің жұмысына оң баға берілгенін айта келе, бұл мерейтойдың елімізде кең көлемде, ауқымды аталып өтетін ұлық мерекемен тұспа-тұс келуін жақсылыққа жорыды. Сонау сұрапыл соғыс кезіндегі ерліктерімен, бейбіт өмірдегі, тың игеру жылдарындағы жан аямас еңбегімен ерекше құрметке ие болып жүр. Міне, егде тартса да ел игілігі жолында аянбай тер төгіп жүрген қарияларға бағалы сыйлықтар тапсырды.
Гүлбаршын ӨКЕШҚЫЗЫ