АУДАНДАР БЮДЖЕТІ АЗАЙМАЙДЫ
Қалалық мәслихаттың бюджет, экономика, өнеркәсіп және кәсіпкерлік мәселелері жөніндегі тұрақты комиссиясының отырысында 2015-2017 жылдарға арналған бюджет жобасын талқылау аяқталды.
Алдымен Астана қаласының Экономика және бюджеттік жоспарлау басқармасы басшысының орынбасары Гүлнәр Жүсіпова депутаттардың қарауына бас қаладағы үш ауданның; Қаржы; Экономика және бюджетті жоспарлау; сондай-ақ тексеру комиссиясының бюджет бағдарламалары әкімшіліктерінің алдағы үш жылға арналған бюджет жобаларын ұсынды. Одан әрі сөз алған аудан әкімдері өз аудандарына қатысты бірқатар проблемаларға тоқталды.
Алматы ауданының әкімі Бекбол Сағынның айтуынша, бүгінгі таңда осы ауданда 578 аула болса, қазір олардың он пайызға жуығы күрделі жөндеуді қажет етіп отыр.
Биыл бес балабақшаға күрделі жөндеу жұмыстары жүргізілген. Дегенмен, мектепке дейінгі балалар мекемелерінің жыл бойы пайдалануға берілуіне байланысты алдын ала бюджетте қарастырылатын ақша жыл соңына таман жетпей жатады. Сонымен бірге аудан басшысы жаңа көшелердің пайда болуына байланысты биыл өткен жылмен салыстырғанда жарықты пайдаланғандары үшін төлемақы көлемінің 25 пайызға артқанын, сондықтан оған да қосымша қаражат қажет екенін айтты. Жалпы, аталмыш ауданның әкімдігіне алдағы үш жылға 40 293,2 млн теңге қарастырылса, оның 12 489,8 млн теңгесі 2015 жылға жоспарланып отыр. Аудан әкімдігінің қызметі негізгі сегіз бағдарламаға негізделген.
Келер жылы Есіл ауданында 7 балабақша пайдалануға беріледі. Бірақ, соңғы жылдары осындай балабақшаларды қабылдап алғанда, онда балаларға қажетті қарапайым заттар, мәселен, төсеніш, ыдыс-аяқ, тіпті, ойыншық болмайтындықтан, бюджетте алдын ала қарастырылған қаражат күрмеуге келмей қалады. Жаңадан пайдалануға беріліп жатқан көшелердің мәселесі де көп қиындықтар тудыруда. Аудан басшысы Сәбила Мұстафина алдағы уақытта осы мәселелерді ойласып шешуді алға тартты.
Қазір бұл ауданда 59 көпқабатты тұрғын үй салынып жатыр. Олардың 24-і жыл соңына дейін пайдалануға беріледі. Ал, коммерциялық тұрғын үйлердің аулаларын бюджеттік тұрғын үйлердікімен салыстыру қиын. Осыған орай, аудан әкімі кез келген жұмыстың жүйелі жүргізілуін ұсынды.
Алдағы үш жылға жоспарланған бюджеттің нақты шығыстар есебінде есептелгені жөнінде айта келе, Сарыарқа ауданының әкімі Ермағанбет Бөлекпаев аудандағы негізгі мәселелерге тоқталды. Бүгінгі таңда бұл ауданда барлығы 706 аула болса, алдыңғы жылы олардың жиырма екісі, өткен жылы алпыс алтысы абаттандырылған. 2015 жылы он үш ауланы абаттандыру жоспарланып отыр.
Баяндамашы атап өткендей, алдағы үш жыл ішінде Астана аудандарына жылдағыдан көбірек ақша бөлінгелі отыр. Ол қамқорлыққа зәру азаматтарға әлеуметтік көмек көрсетуге, аудан аумағындағы елдімекендерді абаттандыру мен көгалдандыруға, көшелерді жарықтандыру мен тұрғын алаптарда тазалықты қамтамасыз етуге бағытталмақшы. Осы және өзге де мәселелерді ескере келе, тұрақты комиссияның мүшелері бюджеттік бағдарлама әкімгерлерінің алдағы үш жылға арналған бюджеттік жобаларын мақұлдады.
Гүлбаршын ӨКЕШҚЫЗЫ