АУЛА КЛУБТАРЫНЫҢ БІРІНШІЛІГІ
16 қарашада Қазақстан Республикасының Тұңғыш Президенті күні қарсаңында елордалық аула клубтарының арасында алғашқы ашық біріншілік өтеді деп хабарлайды Астана қаласы әкімдігінің ресми сайты.
Шараны Жастар саясаты мәселелері басқармасының қолдауымен «Астана жастары» жастар ресурстық орталығы ұйымдастырып отыр.
Мақсат – жастарды Мемлекет басшысының идеялары мен саясатының айналасына топтастыру. Нұрсұлтан Назарбаев өз сөзінде жастар Қазақстан халқын біріктіруді, жалпы дәстүрлер мен құндылықтарды сақтауды көздеген «Мәңгілік ел» бағдарламасын жүзеге асыруға белсенді атсалысуға тиіс екенін атап өткен болатын. Ал, аула клубтары – жастарды осындай отансүйгіштікке баулитын тәрбие ошағы.
Биылғы біріншілікте Астана қаласының аула клубтары тоғызқұмалақ, арқан тартыс, асық ату, қазақша күрес, күміс алу сынды ұлттық спорт түрлерінен өзара жарысады. Қатысушылар кубоктармен, дипломдармен, медальдармен және естелік сыйлықтармен марапатталады.