Ауылға маман бара ма?
Ауыл шаруашылығы саласында білікті мамандар жетіспейді. Ендеше кадрларды дайындау жүйесіне қандай өзгеріс керек? Бұл туралы Астанада өткен «Экономиканың нақты секторы үшін мамандар дайындаудағы университет пен жұмыс берушілердің серіктестігі» атты республикалық форумда талқыланды.
С.Сейфуллин атындағы Қазақ агротехникалық университетінде өткен жиынға ҚР Парламенті депутаттары, 150-ден астам отандық және шетелдік агробизнес өкілдері мен қоғамдық ұйымдар қатысты. Басқарма төрағасы Ақылбек Күрішбаев өз сөзінде әлемнің алдыңғы қатарлы университеттерінің тәжірибесі негізінде кадрларды даярлау жүйесін жаңғырту бойынша білім ордасында атқарылып жатқан жұмыстар туралы баяндады. Айтуынша, оқу орны серіктестің қолдауымен, атап айтқанда әлемде аграрлық білімнің ордасы саналатын Калифорния университетінің үлгісінде кадрлар даярлауды жүзеге асыруда.
Бұған дейін студенттер үшін өндірістік іс-тәжірибе небәрі үш ай болса, университет бұл талапты сегіз айға дейін созып отыр. Осылайша болашақ маманның егіннің себілу кезеңінен бастап оны баптау, ору науқандарына дейін толық қатысуына мүмкіндік беріп отыр.