Аяз ата ордасы ашылды
Елордадағы астаналық саябақта Аяз атаның резиденциясы ашылды. Саябақтың ішінде орналасқан арнайы үйде қала тұрғындары мен қонақтары ертегі кейіпкерлерімен кездесіп, жаңа жылдық көңіл күйді сезіне алады.
Жаңа жылдың қарсаңында басталып, қаңтардың 8-іне дейін жалғасатын думанда балалар Аяз атаға тақпақ айтып, ән шырқайды. Ал бүлдіршіндерге тәтті таратылып, сондай-ақ Аяз ата, Ақшақар және аққала Олафпен бірге естелік суретке түседі. Астана қаласы Коммуналдық меншік қоры директорының орынбасары Ғани Хасеновтің айтуынша, ата-аналар балақайға әзірлеген сыйлығын Аяз ата арқылы табыстай алады. «Барлық елорда тұрғындары мен қонақтарын қысқы уақытты белсенді өткізуге шақырамыз. Аяз ата ордасы жұмыс күндері 13.00-ден кешкі 18.00-ге дейін, ал демалыс күндері 12.00-ден 19.00-ге дейін ашық» дейді ол.
Ойын-сауық мерекеге арнайы орайластырып, астаналықтарды қуанту мақсатында тегін ұйымдастырылып отыр.
Айта кетерлігі, саябақ аумағында мұз айдыны салынып, биік сырғанақ пен «Bubble tab» қысқы аттракционы жасалды. Әдетте, тек жаз айында көркейе түсетін аттракцион енді қыс мезгілінде де жұмыс істейтін болады. Мұздан жасалған сырғанақтың биіктігі – 4 метр, ал ұзындығы 50 метрден асады. Айналасы ағашпен қоршалған мұз айдынының көлемі – 600 шаршы метр. Кешкі және түнгі уақытта шамдар жағылып, келушілер керемет романтикалық атмосфераға бөленеді. Мұз айдыны мен сырғанақ та баршаға тегін.
Мұнымен қоса, коньки мен шананы жалға беру орны, стационарлық дәмхана мен мейрамхана жұмыс істейді.
Астаналық саябақ – қала тұрғындарының сүйікті демалыс орындарының бірі. Ал-
леяның басты артықшылығы сол, айналасы толықтай ағашпен қоршалған саябақ Сарыарқаның ескен желінен қорғап, демалысқа жайлы жағдай жасайды.
Гүлдана ТАЛҒАТҚЫЗЫ