«Азия жаңғырығы» шақырады
Ертең елордада «Азия жаңғырығы» атты халықаралық цирк фестивалі ашылады. Он үшінші мәрте бас қаламызда өтетін цирк мерекесі 28 тамызға дейін жалғасады.
Оған еліміздегі Қазақ мемлекеттік цирк және «Шымкент цирктен» бастап әлемдегі цирктердің жетекші әртістері қатысады.
Атап айтқанда, Беларусь Республикасынан әуе гимнасттары Глеб Казленко мен Наталия Нарышкина, акробат Павел Синельников келеді. Молдоводан көркем гимнастикадан спорт шебері Анастасия Сарычева және акробатикадан спорт шебері Валерий Круглов қатысады. Олардың көрсететін трюктері өте күрделі. Бұл трюктерді әлемде шамалы әртіс жасайды.
Бұған қоса, фестивальде Ресей, Венгрия, Моңғолия, Вьетнам, Өзбекстан, т.б. елдердің үздік цирк әртістері өнер көрсетеді. Билеттер бағасы 1 мың теңгеден басталып, 6 мың теңгеге дейін жетеді. 4 жасқа дейінгі балаларға кіру – тегін.
Баян АСЫЛБЕКОВА