БАҒА БАҚЫЛАУСЫЗ ҚАЛМАЙДЫ
Астана қалалық әкімдігі тұрғындардың үйдегі көңіл-күйі базарда бұзылмауы үшін баға саясатына баса назар аударып отыр. Сол себептен қаланың көп жерінде қазіргі уақытта азық-түлік жәрмеңкесі өткізіледі. Оның үстіне өткен аптадан бастап өңірлердегі ауыл шаруашылығы өнімін өндірушілердің жәрмеңкесі басталды. Мұндағы азық-түлік бағасы базардағыдан орташа есеппен алғанда 15-20 пайызға арзан.
Өткен сенбі-жексенбі күндері Қызылорда облысының ауыл шаруашылығы өнімін өндірушілер астаналықтарға сәбіздің бір келісін 65 теңгеден, қырыққабатты – 55, жұмыртқаны –180, тауық етін – 500-550, күріш – 160, пияз – 70, картоп – 50, қызылша – 70, жылқы етін 1200 теңгеден ұсынды. Енді осы бағаларды елордадағы сауда нүктелеріндегі азық-түлік құнымен салыстырып көрелік. Мәселен, «Астаналық базарда» картоптың бағасы 60-80 теңге болса, сәбіздің де бір келісі осы мөлшерде сатылады. Дұрысына келсек, сапасы жақсы, іріп-шіріген жері жоқ картоптың бағасы елорда базарларында негізінен 80 теңге шамасында болса, «Астықжан», «5 минут» супермаркеттерінде 80-89 теңге төңірегіне тұрақтайды. Ал арнайы ұйымдастырылып жатқан жәрмеңкелерде ең сапалы картоптың бағасы 50 теңгеден аспайды. Сәбіздің бағасын да осылай сараптар едік. Жұмыртқаның 10 данасын «Астаналық базардан» 190-230 теңге шамасында сатып алсаңыз, «Анвар», «5 минут» сияқты супермаркеттерден 319-379 теңгеден арзанын кездестірмейсіз. Пияздың бағасы кейбір супермаркеттерді 80-100 теңгеге дейін барады. Күріштің келісі қаладағы ең арзан базар «Шапағаттың» өзінде 180 теңгеден сатылса, басқа сауда үйлерінде 200-256 теңгеден сатылады, ал «Рамстор» супермаркетінде, тіпті, 403 теңгеден төмені кездеспейді. Жалпы, елорда бойынша «Рамстор» супермаркетінде барлық азық-түлік бағасы басқа жерлерден біршама қымбат екенін айта кеткен жөн. Ал ең арзан баға – қалалық әкімдік ұйымдастырып отырған азық-түлік жәрмеңкелерінде және «Шапағат» коммуналдық базарында. Сондықтан бұл жақтарға барғанда бір сөмке емес, бірнеше қапты қолтықтай кеткен дұрыс болады.
Меңдолла НҰРЫМҰЛЫ