Бағдарламалық мақаланы байыптады
Астана әкімдігінде Президент Нұрсұлтан Назарбаевтың «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» бағдарламалық мақаласын насихаттауға арналған басқосу өтті.
Қалалық Жұмыспен қамту және әлеуметтік бағдарламалар басқармасы ұйымдастырған шараны басқарма бастығы Алма Алтыбаева ашты. Мақаладағы әлеуметтік басым бағыттар мен тапсырмаларға тоқталған Алма Қуандыққызы елорда тұрғындарының ахуалы мен атқарылып жатқан шаруаларды сөз етті. Сонымен қатар жиында қалалық Кәсіподақтар кеңесінің төрағасы Сәрсенбай Мыңбаевтың баяндамасы тыңдалды. Ол Елбасы саясаты қашанда қазақстандықтардың мүддесі үшін қызмет ететінін алға тартып, кәсіподақ ұйымының тиімділіктерін, жұмысшылар құқын қорғаудағы оң істерді әңгімеледі. Басқосу Астана қаласы бойынша Әлеуметтік қорғау және бақылау департаментінің директоры Еркін Рақымбергеновтің баяндамасымен жалғасты.