Елордалық прокурорлор ушығып тұрған алимент мәселесін шешудің тың жолын қолға алды. Астана қаласының прокуратурасында «Алимент берешегін азайту» жобасы таныстырылды.
Прокурорлардың айтуынша, жобаның негізгі мақсаты – алиментші әкелерді жаппай жазаға тарту емес, олардың алдын алуды көздейді. Яғни алимент берешегін төлемей жүрген борышкерлерді жұмыспен қамтамасыз етеді. Өйткені бүгінгі таңда тұрақты жұмысының жоқтығына байланысты алимент төлей алмай жүрген әкелер көп. Мәселен, Астана қаласы бойынша алимент төлеуге міндеттелген 19 мың адамның екі мыңға жуығы жұмыссыз.
Осының салдарынан қаламызда 7 мыңнан астам бала өздеріне тиесілі
400 млн теңге көлеміндегі алиментін ала алмай жүр. «Борышы бар әкелерді жұмыспен қамту жобасын қолға алып отырмыз.
Жұмыссыз ретінде тіркеуде тұрған екі мың азаматты мамандықтары мен игерген кәсіп түрлері бойынша категорияларға бөліп, компанияларға сұрау жібердік. Қазірдің өзінде Астана қаласындағы беделді екі құрылыс компаниясынан электр маманы, сантехник сияқты мамандар бойынша 500 ұсыныс келіп түсті. Сонымен қатар, «Naimi.kz»
интернет сайтымен ынтымақтастық орнатып, алимент бойынша қарызы бар адамдарды сайтқа тегін тіркеу туралы келістік. Бұл сайтқа күніне екі жүзге жуық адам тіркеледі екен.
Сондай-ақ, фейсбук әлеуметтік желісінде «Еңбек-
Алимент» парақшасын аштық. Бұл парақшаға борышкерлер өз түйіндемелерін орналастыра алады» дейді Астана қалалық прокуратурасының соттарда мемлекет мүддесіне өкілдік ету басқармасының басшысы Берік Адамов.
Бүркіт НҰРАСЫЛ
