Елордадағы №3 балалар кітапханасында қазақ балалар әдебиетінің классигі, көрнекті жазушы Бердібек Соқпақбаевтың туғанына 95 жыл толуына орай «Әдебиетке балалықты әкелген» атты әдеби кеш өтті. Кешке белгілі балалар жазушысы Толымбек Әбдірайым қатысты.
Қазақ балалар әдебиетінде Бердібек Соқпақбаевтың салған соқпағы бөлек. Шығармашылық жолын өлеңмен бастаған қаламгер кейін прозаға бет бұрып, жеткіншектер өмірінен тамаша әңгіме-хикаяттар жазды. Әсіресе, суреткердің «Он алты жасар чемпион», «Қайдасың, Гауһар?», «Менің атым Қожа» атты таңғы шықтай мөлдіреп түскен повестерін әлі күнге дейін балалар қызығып оқиды. «Менің атым Қожа» шығармасының желісімен түсірілген фильм 1967 жылы Канн қаласындағы жастар мен балаларға арналған халықаралық фестивалінде бағалы сыйлыққа ие болды. Жазушы өзінің балалық шағын өзек еткен «Балалық шаққа саяхат», «Өлгендер қайтып келмейді» деген екі романы да шыншылдығымен оқырманды баурап алған.
Кеш барысында Толымбек Әбдірайым оқушыларға қарымды қаламгердің өмір жолы мен шығармашылығы туралы әңгімелеп, бір ұсынысын білдірді.
– Бердібек ағамыз 15 қазанда өмірге келген. Соған орай бас қалада жыл сайын қазан айында Соқпақбаевтың туған күніне арнап балалар әдебиетінің апталығын өткізсе деймін. Бұл бір жағынан жеткіншектердің кітап оқуға деген қызығушылығын оятады. Сол апталықта балалар тақырыбына қалам тартып жүрген ақын-жазушылар қатысып, оқушылармен кездесіп, өз шығармалары жайында ой толғап, ұлағатты әңгіме өрбітсе, тағылымды дүние болар еді. Бұл шара елордадан басталып, республикалық деңгейге ұласса деп ойлаймын, – деді қаламгер.
Сондай-ақ кітапхана меңгерушісі Марал Ақтаева жазушы туралы айтқан айтулы тұлғалардың естелігін оқушыларға оқып берді. Кеш соңында балалар қазақ әдебиеті классигінің жарық көрген кітаптарынан ұйымдастырылған көрмені тамашалады.
