БАЛАЛАР АУРУХАНАСЫ ҚОНЫС ЖАҢАРТТЫ
Елорда әкімдігі соңғы жылдары шаһардың денсаулық сақтау мекемелерін заманауи қалыпқа сай үй-жайларға орналастырылу ісіне айрықша мән беруде.
Осыған орай №2 қалалық емхананың балалар бөлімшесі Желтоқсан көшесі, 34-үйдегі бұрынғы №1 қалалық балалар ауруханасынан босаған ғимаратқа қоныс тепті.
Ал, бұрын-соңды науқас балалардың көптігінен орын тапшылығын сезініп келген №1 балалар ауруханасының еншісіне Тәуелсіздік даңғылы 11/1 мекенжайындағы кең де жарық ғимарат тиді.
Айта кетерлік жайт, қаламызда балаларды емдеуге маманданған екі аурухана бар. №1 қалалық балалар ауруханасы – 120 төсек орынға арналған көп бейінді стационар. Мұнда, әсіресе, туабітті дімкәстікке шалдыққан, шала-жансар туған, неврологиялық патологиясы бар балаларды емдейтін білікті дәрігерлер қызмет етеді. Ал, Қошқарбаев көшесіндегі 4 мамандандырылған стационарлық бөлімше және 9 параклиникалық (көмекші) бөлімшелері бар №2 қалалық балалар ауруханада негізінен 15 жасқа дейінгі жасөспірімдерге ем-дом жасалады.