Астанада Халықаралық «Ақ көгершін» балалар шығармашылығы байқауы өтті. Өнер додасының онжылдық мерейтойында биыл Ресей, Қырғызстан, Қазақстанның түкпір-түкпірінен келген 1500-ден аса үміткер бақ сынады.
Екі күнге созылған сайыс ҚР Білім және ғылым министрлігі мен Астана қаласы әкімдігінің қолдауымен елордадағы «Жастар» және Оқушылар сарайында, №3 балалар музыка мектебінде өткізілді. Талабы таудай таланттар 7 аталым бойынша өнерін ортаға салды. Атап айтқанда, 4 пен 17 жас аралығындағы қатысушылар хореография, вокал, дәстүрлі ән, аспапта ойнау, сән, көркемсөз оқу шеберлігі және ерекше жанрда өзара сынға түсті. Жарыс барысында сахналанған көріністерде Тәуелсіздіктің 25 жылдығы тақырыбы кеңінен айшықталды.
«Ақ көгершін» байқауы – өнер жолының алғашқы баспалдағы. Жарысқа үкілеген үмітпен қатысатын дарынды өнерпаздардың ішінен жаңа есімдер анықталады. Балалар үшін бұл – тартысты бәйге ғана емес, достық, шығармашылық, берекелі бастамалардың мерекесі. Конкурс бағдарламасы шеңберінде қатысушы өнерпаздар Астанадағы Балалар үйінде қайырымдылық концерт көрсетті. Сондай-ақ, бас шаһардың сәулетті жерлеріне саяхат жасады. «Бәйтерек» монументін, Бейбітшілік және келісім сарайын аралап, «Жастар» театры спектаклін тамашалады» дейді «Ақ көгершін» балалар қорының президенті Тамара Ескенова.
«Жастар» сарайындағы гала-концертте әр номинацияға сәйкес гран-при иегері анықталып, барлық қатысушылар диплом және бағалы сыйлықтармен марапатталды. Астана қаласының өнерпаздары 4 номинация бойынша гран-при жүлдесін жеңіп алды. Жүзден жүйрік шыққан астаналықтар: «вокал» аталымы бойынша өнер көрсеткен – 6 жастағы Кәусар Өмірсерікқызы, дәстүрлі орындаушылырдан – «Кербез қыздар» жетігеншілер ансамблі, хореографиядан – «Тұлпар» би тобы және балалар сәнін көрсеткен Әлия Абдраш.
Мәдина ЖАҚЫП
