26 маусым күні «Қазақстан» орталық концерт залында балет өнерінің жарық жұлдызы, украиндық өнерпаз Денис Матвиенконың театры «Quatro» және «Radio and Julie» қойылымдарын қояды. «KJ» арт агенттігінің шақыруымен елордаға ат басын тірейтін өнер ұжымының жаңалығы неде? Оны бізге аталмыш агенттіктің арт-директоры, балетмейстер Жәнібек Қайыр айтып берді.
– Компанияны құрудағы басты мақсатым – қазақстандық көрерменді әлемдік балет жұлдыздарымен, осы өнердің жаңа ағымдарымен жақын таныстыру. Балет тек қана классикадан тұрмайды. Қазір модерн сияқты заманауи бағыттар да шықты. Денис Матвиенконың өзі – сондай жаңашылдыққа жақын, балеттің қыр-сырын меңгерген әлемдік деңгейдегі жұлдыз, Мария театрының премьеры, Үлкен театр шақырған жұлдызды балет бишісі. Биылдан бастап ол Новосібірдегі опера және балет театрының көркемдік жетекшісі қызметіне кірісіп отыр, – деп бастады әңгімесін балетмейстер.
Оның айтуынша, «Radio and Julie» балеті классик қаламгер Уильям Шекспирдің «Ромео мен Джульетта» шығармасының желісімен қойылмақ. Алайда, қойылым жаңаша талдауда болмақ.
«Денис оның орнына «Sabat» балетін ұсынған. Бірақ, аталмыш балетті қазақстандық көрерменнің назарына шығару әлі ертерек деп ойлап, алдындағы шығармаға тоқтадық. Бұл балетте «Radio and Hair» деген атақты рок-топтың музыкасы ойнайды. Музыка мен қойылым-ды қоюда хореограф Эдвард Клюк көрерменді қызықтыратын өзіндік ерекшеліктерді тапты. Осындай балетті қазақстандықтар әлі көрмеген.
Ал «Quatro» балетінде осы өнер түріндегі жаңа ағымдар, яғни, технология заманындағы қазіргі тыныс-тіршілігіміз қарбаласымен қоса көрініс табады. Яғни, бұл шығарма арқылы бүгінгі өмірімізді сыртынан тамашалауға болады.
Балетке төрт кейіпкер қатысады. Оның әрқайсысының өз өмірі, өз энергетикасы бар. Бір ерекшелігі – «Quatro» балетіне арнайы музыка жазылды. Сахнада ол рояль мен виолончельдің сүйемелдеуімен жанды дауыста орындалады» дейді Жәнібек Қайыр.
Балетмейстер әңгіме барысында «Астана Опера» театрының қойылымдарына қатысты да пікірін білдірді. Оның сөзінше, театр қойғалы отырған «Париж Құдай анасының ғибадатханасы» балеті – өнер ұжымының үлкен даму жолына түскенінің белгісі және өнердегі зор жетістіктерге жетелейтін қойылым. «Сондай қойылымдар Астанада жиірек қойылуы тиіс. Сонда халықта да таңдау болып, балет өнеріне жақындай түседі» дейді ол. Агенттік те бұл театрмен болашақта әріптестік орнатпақ.
«KJ» арт агенттігі Астанада шетелдік әртістердің қатысуымен балет қою жобасын алғаш рет қолға алып отыр. Агенттік арт-директоры болашақта елордаға әлемдік жұлдыздар қатысатын классикалық балеттерді әкелмек. Сондай-ақ, шетел сахналарында өнер көрсететін қазақ жұлдыздарын Астанаға жинау мәселесін ойластыруда. Мәселен, Будапешт театрында жұмыс істейтін Әлия Танықбаева сынды бишіні шақырмақ. Балетмейстердің айтуынша, ол сияқты әлемдік деңгейдегі қазақ әртістері шетелде өте көп. Бұйыртса, бұл жоба да алдағы бірнеше жылда жүзеге асады.
Аманғали ҚАЛЖАНОВ
