БАҚЫЛАУДЫ КҮШЕЙТТІК
Осыдан бір ай бұрын мектеп оқушылары арасында вирусті А гепатиті өршігені байқалды. Осыған байланысты Астана қаласы бойынша Тұтынушылардың құқықтарын қорғау департаменті қандай шараларды қолданды? Жалпы, вирусті А гепатиті қандай ауру? Осы жөнінде аталмыш департаменттің Эпидемиологиялық қадағалау бөлімінің басшысы Салтанат Әубәкіровадан білген едік.
– Вирусты А гепатиті туралы жалпы мәлімет беріп, оны алдын алудың жолдарын айтсаңыз.
– Дүниежүзілік денсаулық сақтау ұйымының мәліметтерінше, бұл – адамдардың арасында ең көп таралатын жұқпалы ауру. Шамамен алғанда жыл сайын әлемде осы ауруға 1,4 млн адам шалдығады. Алдымен адамның бауыры зақымданып, бұл жағдай сарыауруға апарады. Оның таралу жолы жалғыз – науқастанған адамнан басқа адамға жұғады. Бұл вируспен көбінесе 14 жасқа дейінгі балалар ауырады. Сырқаттанушылардың 50 пайыздан астамы осы жастағы балалар болғаннан кейін статистика осылай дейді.
Оны алдын алу үшін арнаулы шара – вакциналау қолданылады. Астана қаласында 2005 жылдан бастап жоспарлы түрде 2 жасар сәбилерді иммундау жүргізіледі. Ол вакцина жергілікті бюджет есебінен сатып алынады.
– Мектеп оқушылары арасында аталмыш вирустың өршуіне байланысты қандай шараларды қолдандыңыздар?
– Мектептерді сумен жабдықтау жүйесін, эпидемияға қарсы режимді бақылауды күшейттік. Одан басқа бұрын екпе жасалмаған 1,2,3,4 сыныптардың оқушыларын, сондай-ақ, олармен қатынаста болған жоғары сынып оқушыларын иммундау шешімі қабылданып, іске асырылуда.
– Ал, ересек адамдарға екпе жасау қарастырылған ба?
– Вирусқа қарсы екпе жасатқысы келетін үлкендерге «OpenClinic» емханасына барып, ақылы түрде екпе жасатуға кеңес береміз.
Аманғали ШМИТҰЛЫ