БАҚЫТТЫ БОЛАШАҚ БАҒДАРЫ
Өткен бейсенбі күні «Қазақстан» орталық концерт залында Есіл ауданы әкімі аппаратының ұйымдастыруымен Мемлекет басшысының Қазақстан халқына арнаған «Нұрлы жол – болашаққа бастар жол» Жолдауының негізгі бағыттарын түсіндіру мақсатында халықпен кездесуі өткізілді.
Іс-шараға Астана қаласының басқармалар, коммуналдық кәсіпорындар басшылары мен ауданның мемлекеттік құрылымдары мен ұйымдарының қызметкерлері қатысты.
Жиналғандар алдында Астана қаласы әкімінің орынбасары А.Балаева мен Л.Н.Гумилев атындағы Еуразия ұлттық университетінің проректоры, филология ғылымдарының докторы Д.Қамзабекұлы Елбасы Жолдауында айтылған бірқатар мәселелерге тоқталды.
Елдік ұстанымдар, ұрпақ сабақтастығы, Мәңгілік ел, білім, ғылым тақырыбында сөз өрбіткен ғалым Д.Қамзабекұлы Жолдаудағы негізгі жеті бағыт мемлекеттің өркендеуі мен жастардың болашағына байланысты жасалатын зор қамқорлыққа толы екендігін айтты.
Ал, өз сөзінде Аида Ғалымқызы «Біздің осы қол жеткен жетістігіміз, ең бірінші, елдің бірлігі мен татулығының, қоғамдағы саяси тұрақтылық пен ауыз бірліктің арқасында мүмкін болуда. Тәуелсіздіктің нығая түсуі әр адамның жақсы ниеті мен жауапкершілігіне байланысты болмақ. Қазір біздің әлеуметтік жағдайымыз жылдан-жылға жақсарып келеді. Міне, Елбасының көрегендік саясатының нәтижесінде құрылған Ұлттық қордан бөлінетін қомақты қаржы сол қол жеткен жетістіктерді төмендетпеуге мүмкіндік береді» дей келіп, елордадағы мектепке дейінгі білім беру, баланы балабақшаға орналастыру мәселелерінің өзектілігіне, бұл реттегі мемлекеттік және жеке меншік әріптестік тетіктеріне, халықты жұмыспен қамту саласында атқарылып жатқан шаруалардың пәрменділігіне тоқталды.
Жыл басынан бері 62,6 мың зейнеткерге, 235 соғыс ардагері мен қатысушысына, 19,4 мың мүгедек пен 5,5 мыңға жуық көп балалы отбасына, 8 мыңнан астам тұрмысы төмен азамат пен көп балалы анаға – барлығы 83 мың адамға әлеуметтік көмек көрсетілген.
– Кейінгі жылдары жастар арасында жұмыссыздық деңгейі екі есе азайды. Бұл – елорда сияқты көші-қон қарқыны жоғары қала үшін өте жақсы көрсеткіш. Еңбек ете отырып, ел экономикасын өркендетуге осы жігіттер мен қыздардың қосар үлесі зор. Болашақта тәуелсіз еліміздің тұғыры биіктеп, қарыштап дамуы үшін сапалы білім, саналы тәрбие алған отансүйгіш жастар ғана бар белесті бағындыра алады. «Нұрлы жол – болашаққа бастар жол» бағдарламалық құжатында Президент біршама тапсырмалар берді, олардың орындалуына қаражат бөлді. Енді, біз сол белгіленген міндеттерді жүзеге асыру үшін жұмысқа белсене кірісуіміз керек» деді қала әкімінің орынбасары.
Сағи ОРАЛ