Sport
«БАРЫСТЫҢ» ЖОЛЫ БОЛМАЙ ЖҮР
1 наурыз күні Астаналық «Барыс» КХЛ аясында өткен кезекті кездесуінде Санкт-Петербордың «СКА» командасына есе жіберіп қайтты.
Ақ түндер қаласында өткен тартысты доданың бірінші кезеңінде қос команда бір-бірінен айла асыра алмай, 0:0 есебімен тең тарқасқан болатын. Екінші кезеңде «Барыс» хоккейшілері алғашқы болып жергілікті спортшыларды қапы қалдырды. Бірақ, бір минут өтпей жатып-ақ қарсыластар таразы басын теңестірді. Іле-шала астаналықтар тағы да есепті еселеп, суырылып алға шықты. Кейін «СКА» хоккейшілері таблоға 2:2 есебін жазды. Матчтың соңғы кезеңінде айдын иелері бір шайбамен «Барысты» жерге қаратып кетті.
Астаналық команданың келесі ойыны 2 наурыз күні Череповец қаласында «Северсталь» хоккейшілерімен болды. Бірақ онда да жолымыз болмай, 1:2 есебімен ұтылып қалдық.
Бұл – «Барыстың» қатарынан үшінші жеңілісі.
Нұрислам ҚҰСПАНҒАЛИ