Елорданың қарқынды дамуына сай барлық жағдайларды ескеріп, жаңа бас жоспар жасалуда. Бұл жайында Нұр-Сұлтан қаласының Сәулет, қала құрылысы және жер қатынастары басқармасы мәлімдеді.
Бұған дейін 2010 жылы бас жоспарды жасау кезінде елорда халқы 2030 жылға қарай 1 миллион 200 мың адам болады деп есептелген. Алайда жағдай шындығында басқаша болып, қала халқының саны 2020 жылдың өзінде аталған межені оңай еңсерді. Өз кезегінде бұл фактор елордалықтардың сұраныстары мен талап-тілектерін қанағаттандырудың барлық мүмкіндіктері қарастырылған жаңа бас жоспар түзу қажеттілігін туындатты.
Бүгінде қалада «Нұр-Сұлтан» – қолайлы қала» шебер-жоспары іске асырылып жатыр. Бұл жоспар қаланың бас жоспары мен елорданың 2030 жылға дейінгі даму стратегиясы негізінде жасалған. Сондықтан онда тұрғындарға қолайлы орта қалыптастырумен бірге қалалық ресурстарды жоспарлау, электрэнергетикасының шығынын есептеу, тарифін болжау, құрылыс нысандарының тығыздығы сынды негізгі параметрлерді де қамтиды. Бұдан бөлек, шебер-жоспар қолжетімді тұрғын үй құрылысының қарқынын арттырудың да мүмкіндіктерін қарастырады.
