Бастауышпен қоштасты
Ғали Орманов атындағы №7 мектеп-гимназияда бастауыш сынып түлектерінің «Қош бол, бастауыш!» атты салтанатты кеші өтті. Білімнің бұлағынан сусындаған 30-ға жуық бастауыш сыныпты бітірушінің 7-еуі үздік көрсеткішпен оқуын тәмамдап, ұстаздарымен қоса ата-аналарын зор қуанышқа кенелтті.
Білімді ұрпақ тәрбиелеу мақсатында республиканың білім ордаларында жүзеге асырылып жатқан шаруалар қыруар. Осындай білім ошақтарының қатарында қаламыздағы Ғ. Орманов атындағы мектеп-гимназияны ерекше атаған жөн.
Осынау мектепте 2000 жылдан бері қажырлы еңбек етіп, талантты да талапты оқушылар тәрбиелеп отырған Қарлығаш Даниярбекқызы: «Біздің бүгініміз де, ертеңіміз де – білімді ұрпақ қолында. Білімсіз ұлт – тұл» деп санайды.
Ұрпақ тәрбиесіне зор үлес қосып жүрген ұлағатты ұстаз 27 жылдық еңбек өтілімен талай шәкіртке қанатын қақтырған. Осы уақыт аралығында 4 рет қатарынан түлектердің қамқоршысы болған ұстаз еңбегі биыл да ақталып отыр.
Білім көрсеткіші бойынша қаламыздағы 30-ға жуық мектеп арасында Қарлығаш Даниярбекқызының өрендері биіктен көріне білді.
Аталмыш гимназия директоры Жанат Айтованың сөзіне құлақ ассақ, «бүгінгі қанат қағып отырған түлектер – қазақтың көгіндегі болашақ қырандары. Бастауышта қандай озат болса, жоғары сыныптарда да ұландарымыз үміттерімізді ақтайды» деген сенімде.
Білімді де білікті ұрпақ – халықтың берік іргетасы іспетті.
Аталған мектептің өрендері – осы сенімді ақтайтын сөзіміздің нақ куәсі.
Саян ЕСЖАН