Жаңалықтар
БАТЫР АНАЛАРДЫҢ ҚАТАРЫ КӨБЕЙДІ
Кеше Алматы ауданының әкімі Бекбол Сағын көпбалалы аналарға «Алтын алқа» мен «Күміс алқа» тапсырды.
Әйел қауымын көктемнің алғашқы мерекесі – Халықаралық әйелдер күнімен құттықтаған аудан әкімі: «Сіздерді көктемнің алғашқы күндеріне сәйкес келетін тамаша мерекелеріңізбен құттықтаймын. Елбасының Жарлығымен осы әдемі мейрам қарсаңында көп бала тәрбиелеп өсірген аналарға алтын және күміс алқа тапсыратын дәстүр бар. Бүгінде олардың қатары көбейіп келе жатқаны қуантады» деп атап өтті.
Қазіргі таңда Астанада көп балалы аналардың саны 7700 болса, соның 4235-і Алматы ауданында тұрады екен. Биыл алты ана «Алтын алқа» еншілесе, 20-сы «Күміс алқалы» болып отыр. Марапатталғандардың ішінен 7 бала тәрбиелеп өсірген Күндей Нүркенова әжей сөз сөйлеп, алғысын білдірді. Іс-шара соңында көпбалалы аналарға бағалы сыйлықтар тапсырылды.
Қымбат НҰРҒАЛИ