Баян НҰРМЫШЕВА, әнші: «ЖАНДЫ ДАУЫС – ЖАНЫМА ЖАҚЫН
– Әншілікпен қатар сазгерлігіңіздің де бар екенін білеміз. Алғашқы әніңізді қашан жаздыңыз?
Дана МАНБАЕВА, мұғалім
– Өзімді сазгермін деп есептемеймін. Әуестікпен әуен шығаратын кездерім болады. Дегенмен, алғашқы әнімді жазуыма балаларға арналған жыр жинағының қолыма түсуі себеп болды. Ол кезде 9 жаста болатынмын. «Балмұздақ» және «Жолың болсын, түйелер» деген өлеңдерге ән шығардым. Оларды кейін «Әнші балапан» байқауында құрбыларым орындады.
– Гитарадан басқа қандай аспапта ойнай аласыз?
Мағжан БЕКШЕНОВА, саз өнері пәнінің мұғалімі
– Құрманғазы атындағы ұлттық консерваторияның «Халық әні» бөлімінің түлегі болғандықтан, ұлттық аспабымыз – домбыраның «тілін» жетік меңгергенмін. Оған қоса, Қайрат Байбосынов ағамыздың сыныбынан дәріс алдым. Сондай-ақ, сазсырнайда ойнай аламын. Одан бөлек кәсіби болмаса да, фортепианоны аздап тартатыным бар.
– Фонограмма мәселесі жайында не айтар едіңіз?
Айнұр ҒАБДОЛЛА, жас маман
– Фонограмма туралы дұрыс, бұрыс деп айта алмаймын. Екі жағы да бар. Жалпы, фонограмма мәселесі тек әншіге ғана байланысты емес, дыбыстың сапасы, концерт залының дұрыс жарақтандырылуы, бәрі – өзара сабақтас нәрсе. Мысалы, үлкен залдарда өтіп, ол жердің дыбыс шығаратын техникаларының барлығы сапалы болса, еш қиындық жоқ. Ал, жанды дауыста ән салу әншінің өсуіне септігін тигізеді. Сондай-ақ, әншілердің халықтың алдындағы жауапкершілікті сезінуіне ықпал етеді. Өзіме келетін болсам, жанды дауыс – жаныма жақын.
– Бірде сахнаға домбырамен шығып, ән салатыныңызды айтып едіңіз. Қашан сол сәттің куәгері боламыз?
Панаркүл БЕГДЕРБЕКОВА,оқырман
– Реті келгенде ол да бола жатар. Домбырамен үлкен сахнада ән салып көрген емеспін. Достарымның арасында, отырыстарда ән салатыным бар.
– Ас үйге қырыңыз бар ма? Қандай тағамды жақсы көресіз?
Жұлдыз ӘЛІБАЕВА,медбике
– Әрине, әрбір қазақтың қызы сияқты мен де тағам әзірлей аламын. Әсіресе, өзімізге етене етті дәмді етіп асамын. Жалпы, теңіз тағамдарын ұнатамын.
– Қандай ақындармен, сазгерлермен шығармашылық байланыстасыз?
Жұлдыз ӘЛІБАЕВА,медбике
– Жалпы, шығармашылығы ұнайтын азаматтардың барлығымен шығармашылық байланыстамын десем болады. Қазіргі таңда «МузАРТ» тобының музыкалық продюсері Арман Бексұлтанмен жұмыс жасап жатырмын.
– Қоғамдағы қандай жағдайлар алаңдатады?
Жайдарлым СӘРСЕНБЕКОВА,жас маман
– Қоғамның бір мүшесі болғандықтан, айналама бейжай қарай алмаймын, Алаңдайтын мәселе көп. Табиғи апаттар, балалардың болашағы алаңдатады. Олар келешекте қандай қоғамда өмір сүреді?
– Бізде еліктеушілік басым деп жатамыз. Дегенмен шетелдік өнер иелерінің қандай қасиетін өзімізден көргіңіз келеді?
Гүлзат ЖҮНІСОВА, мұғалім
– Шетелдіктерден үйренеріміз көп. Олар эксперимент жасаудан қорықпайды. Өздерін әр жанрда сынап көреді. Сол арқылы өзіне керегін таңдап алады. Біз де эксперимент жасаудан қорықпауымыз керек. Ең бастысы, ұлттық рухымызды жоғалтпасақ, болғаны.
– Ұлыңыздың есiмi кiм. Ол өнерлi ме? Өнер адамы болғанын қалайсыз ба?
Толғанай ҚАЛТАЙҚЫЗЫ, қала тұрғыны
– Ұлымның есімі – Ілияс. Өнерлі деп айта аламын. Егер болашақта өнер адамы боламын деп жатса, қарсылығым жоқ. Қолдау көрсетуге дайынмын. Ең бастысы, өз мамандығын сүюі керек. Сол кезде еңбегі жемісті, табысты болады.
– Алдағы жоспарларыңызбен бөліссеңіз…
Шарбат ЖҮНІСОВА, оқырман
– Алла бұйыртса, жаңа альбомым жарыққа шығады. Жинақ екі бөлімнен тұрады. Тыңдармандар өздері бағалай жатар.
Еркежан СӘТІМБЕК