Елбасы Нұрсұлтан Назарбаев пен Қазақстан Президенті Қасым-Жомарт Тоқаев ЭКСПО қалашығы аумағында орын тепкен этноауылға барып, халықты Наурыз мерекесімен құттықтады.
Этноауылды жағалай он жеті киіз үй тігілді. Сол маңайда театрландырылған қойылымдар, ұлттық спорт ойындары, қолөнершілер көрмесі ұйымдастырылып, салт-дәстүрлеріміз дәріптелді. Елбасы мен Президент этноауылды аралап, елорда қонақтары және тұрғындарын, барша қазақстандықтарды Наурыз мерекесімен құттықтай отырып, бақ-береке тіледі.
Наурыз тойында елордада некелерін қиған 9 жұп та сол жерден табылып, Нұрсұлтан Назарбаевтың ақ батасын алды. Елбасы жас отбасыларды есте қаларлық маңызды күндерімен құттықтап, оларға бақытты, ұзақ өмір тіледі.
– Сендерге бақыт тілеймін! Махаббаттарың еш уақытта сөнбесін. Алдарың ашық болсын. Балалы-шағалы, үбірлі-шүбірлі болыңдар! Ата-аналарыңа қуаныш әкеліңдер. Елдің азаматы болыңдар! – деді Нұрсұлтан Назарбаев.
Қасым-Жомарт Тоқаев та халыққа құттықтау жолдады. «Бәрімізді қуаныш пен сүйіспеншілік сезіміне бөлейтін бұл мереке – бейбітшілік пен жақсылықтың нышаны. Оның философиялық мәні зор және бүкіләлемдік мәдени сипаты бар. Көне заманнан бастау алатын осынау мейрам жаңару мен жаңа өмірдің басталу сәтін сипаттайды. Наурыз – рухани бай мұрамыздың, бірегей ұлттық кодымыз бен үздіксіз ұрпақ сабақтастығының жарқын символы. Бұл мереке өмірімізге жасампаздық пен дамудың жаңа лебін әкеледі. Бүгінде Наурыз – ортақ шаңырағымыз – Қазақстан Республикасындағы достықты, өзара құрмет пен келісімді нығайтуға септігін тигізетін шын мәніндегі жалпыхалықтық мейрам. Оның мәңгілік мәні – ең жоғары құндылығымыз бен ортақ байлығымызды – халықтың ынтымағын бекемдеу. «Бірлік бар жерде, тірлік бар» дейді халық даналығы. Әз-Наурыз әр отбасына бақ-береке әкелсін!» делінген Президент құттықтауында.
