Халықаралық балаларды қорғау күнінде елордада бес гүлзар ашылды. Қаланың үш ауданында тұрғындар демалатын жаңа орындар пайда болды.
Атап айтқанда, Омаров көшесіндегі «Музыкалық жас көрермендер театры» ғимаратынан Республика даңғылына дейін, сондай-ақ «Sine Tempore» СҮ ғимаратының алдындағы алаңда жаяу жүргіншілер аймағына қайта жөндеу жүргізілді. Тұрғындар бос уақытын өз үйлерінің жанында өткізу үшін олардың ұсынысы да ескерілді. Ал бос қалған жерлерге заманауи субұрқақ, ойын-сауық және балалар алаңы мен шағын сәулет нысаны салынды. Сондай-ақ қоқыс жәшіктері бар орындықтар мен заманауи дизайн шамдары орнатылып, көгалдандыру жүргізілді.
Бұдан бөлек, Байқоңыр ауданында үш жаңа сквер ашылды. Алғашқысы Абай даңғылы бойындағы №53/1 және №57/1 үйлер ауданында орналасқан. Мұнда тұрғындар үшін тыныш, балалар алаңдары және отбасылар мен жастарға жайлы уақыт өткізуге арналған аймақтар бар. Веложол аумағы гүлзармен көмкерілген. Екінші сквер Иманов көшесіндегі №32, 34 және 36 үйлер ауданында ашылды. Оның негізгі аумағында аллея орналасқан. Сондай-ақ Пушкин көшесінде тағы бір қоғамдық кеңістік таныстырылды. Мұнда фитнес залдарында болатын тренажерлердің барлық түрі бар. Айырмашылығы – құрылғылар көше спортына бейімделген. Үлкен жабық шатыр жазда да, қыста да Есіл өзенінің жағасында таза ауада жаттығуға мүмкіндік береді.
– Скверді салудағы ең басты мақсат – ағаштарды сақтау. Себебі олар мұнда бірнеше жылдан бері өсіп тұр. Олардың көпшілігі – үлкен ағаштар мен көшеттер. Біз тұрғындардың барлық тілегін ескеріп, ағаштардың 100 пайызын сақтадық. Қосымша 300-ге жуық бөртегүл бұталары отырғызылды. Олардың иісі шығып, гүлдеп тұр, – деді Нұр-Сұлтан қаласы әкімдігі Қоршаған ортаны қорғау басқармасы басшысының орынбасары Айдын Бегімбеков.
Сонымен қатар «Интернациональный» тұрғын алабында жаңа сквердің тұсауы кесілді. Мұнда ойын және «Street Workout» аймағы ашылды. Шағын сәулет пішіндерімен безендірілген аймақта орындықтар, қоқыс жәшіктері және көше шамдары жеткілікті мөлшерде орнатылған.
– Қаланың шетінде тұрсақ та, бізге орталықтағыдай жайлы жағдай жасалған. Бұған өте қуаныштымыз. Үлкендерге де, балаларға да жақсы, – деді қала тұрғыны Бақыт Сүлейменова.
Елорданың барлық қоғамдық кеңістігі ерекше қажеттіліктері бар адамдар үшін жасалып, арнайы жабдықталған.
