Би бәсекесі
Астанадағы «Rixos Prezident Hotel Astana» қонақ үйінде заманауи және спорт билері бойынша ІІІ қазақстандық Би олимпиадасы өтті.
Би сайысына қатысушыларды Ресейден, Өзбекстаннан, Кубадан, Қазақстаннан және Қырғызстаннан келген өкілдерден құралған қазылар алқасы бағалады. Мұнда өздерінің шеберліктерін көрсету үшін еліміздің 10 аймағы мен көршілес мемлекеттерден 700-ден астам биші келді. Олимпиада: балет, ұлттық, шығыстық, балдық және эстрадалық билер, степ, сальса, тіпті, мүгедектер үшін «бесік арбадағы би» сияқты барлық бағыттар бойынша өтті.
Олимпиадаға қатысушылардың 40 пайызға жуығы – балалар. Жарыс барысында бес жасар бүлдіршіндер алғашқы рет үлкен сахнаға шығып, кәсіби бишілермен бақ сынасты.
Жарыс нәтижесінде, ұлттық би аталымы бойынша Астана қаласының «Estrella’s Dance Academy Istina» би тобы жеңімпаз атанса, тағы бір елордалық топ – «Остров Данс» эстрадалық би өнерінен үздік танылды. Би шоуынан да қаламыздың «Индиго» бишілер тобы қарсыластарынан озық шықты. Сонымен қатар, әлем халықтарының биі аталымы бойынша шығыс биін билеген Астана қаласындағы «Асыл арман» балалар үйінің өнерпаздары бірінші орынмен марапатталды және заманауи би аталымы бойынша да бас қала бишілерінің бағы жанды. Тағы да көптеген номинациялар бойынша қазақстандық өнерпаздармен қатар өзбекстандық, ресейлік бишілер бақ сынап, жеңіске жетті. Би марафоны екі күнге созылып, көрермендерді шаттыққа бөледі.
Ербол ЖАНАТ